သင့်အချိန်ကို အများဆုံးဖြုန်းတီးပစ်စေတဲ့ အရာများ

Posted on

ကျွန်တော်တို့ရဲ့ အချိန်တော်တော်များများကို အကျိုးမရှိစေတဲ့ အရာတွေနဲ့ပဲ ကုန်လွန်လေ့ရှိပါတယ်။ ကိုယ့်အတွက် အကျိုးမရှိမှန်းသိပေမယ့် မလုပ်ရင် မနေနိုင်အောင်ကို နေ့စဉ် လုပ်မိနေတတ်ကြပါတယ်။ အခုခေတ်မှာ ကျွန်တော်တို့အချိန်တွေကို အများဆုံးဖြုန်းတီးပစ်စေတဲ့ အရာတွေကတော့

၁။အင်တာနက်

တကယ်တော့ ဂရုတစိုက်သုံးစွဲမယ်ဆိုရင် အင်တာနက်ဟာ တကယ့်ရတနာသိုက်ကြီးပါပဲ။ သင်တစ်ခုခု သိချင်သလား ၊ အဝေးက သင့်အသိတစ်ယောက်နဲ့ စကားပြောချင်သလား ၊ ဒါမှမဟုတ် စိတ်ကြိုက် သီချင်းတစ်ပုဒ် လောက် နားထောင်ချင်သလား၊ ဒါမှမဟုတ် တစ်ကမ္ဘာလုံးကို ထိုင်ရာကမထ ကြည့်မလား။ အင်တာနက်က ကူညီပေးပါလိမ့်မယ်။ ဒါပေမယ့် ဆိုရှယ်နက်ဝက်လို့ခေါ်တဲ့ လူမှု့ကွန်ယက်ထဲကို ဝင်သွားပြီ ဆိုရင်တော့ ပြန်ထွက်ဖို့ ခက်သွားပါပြီ။ ၁၅မိနစ်လောက် ကြည့်ရင် ပြီးရမယ့် ကိစ္စကို new feed တွေကို ကြည့်ရင်းနဲ့ ၁နာရီမက ဖြုန်းတီးပစ်လိုက် မိပါတယ်။

၂။လက်ကိုင်ဖုန်းများ

ဖုန်းတွေမှာ သုံးစွဲစရာ ကဏ္ဍများစွာ ပါရှိပါတယ်။ ဖုန်းပြောခြင်း၊ မတ်ဆေ့ ပို့ခြင်း၊ အင်တာနက်သုံးခြင်း၊ ဓာတ်ပုံ၊ သီချင်း၊ ဗီဒီယို စသည်ဖြင့်ပါဝင်ပါတယ်။ ဖုန်းတစ်လုံးကိုကိုင်နေရရင် အချိန်ကို သတိမထားမိကြတော့ပါဘူး။ နေရာတိုင်း အချိန်တိုင်းလိုလိုမှာဖုန်းမျက်နှာပြင်ကို ပွတ်နေတဲ့ လူတွေကို သင်တွေ့နေရ ပါ လိမ့်မယ်။ဖုန်းဟာ ကျွန်တော်တို့အချိန်ကို အဖြုန်းဆုံးအရာလို့တောင် ဆိုရပါလိမ့်မယ်။

၃။ရုပ်မြင်သံကြားနဲ့ဖျော်ဖြေရေး

တစ်ချို့လူတွေဟာ ည၇နာရီ ၉နာရီစသည်ဖြင့်အချိန်ပေးပြီး စောင့်နေတတ်ကြပါတယ်။ အခန်းဆက် တီဗီ ဇာတ်လမ်းတွေ ပြိုင်ပွဲအစီအစဉ်တွေကို ကြည့်ဖို့ပါပဲ။ ဒီအထဲမှာ သင်ကိုယ်တိုင်တောင် ပါဝင်နေတတ်ပါတယ်။ အစီအစဉ်တွေ ကလည်း တစ်နေ့တစ်မျိုးမရိုးနိုင်အောင် လာနေပါတယ်။ ဒါတွေကို ကြည့်ရင်းနဲ့ ကျွန်တော်တို့ရဲ့ညနေ ကနေ အိပ်ချိန်အထိ အချိန်တွေ ကုန်ဆုံးရပြန်ပါတယ်။

၄။အဆိုးမြင်စိတ်များ

အချိန်ဖြုန်းတဲ့ထဲမှာ ရုပ်ဝထ္ထုတွေတင် မကပါဘူး။ ကျွန်တော်တို့ရဲ့ အဆိုးမြင်စိတ်တွေဟာလည်း ပါဝင်ပါ တယ်။ ကိစ္စတစ်ခုခုလုပ်ဖို့ ကြုံလာတိုင်းမှာ ဒါဟုတ်ပါ့မလား ၊ဖြစ်နိုင်ပါ့မလား စသည်ဖြင့် အဆိုးဘက်မှတွေးရင်း တွေးရင်းအချိန်တွေ ကုန်တတ်ပါတယ်။ ဒီစိတ်ကြောင့် လုပ်စရာရှိတာကို မလုပ်မိပဲ အခွင့်အရေးတွေ ၊ ပျော်ရွှင်မှု့တွေ၊ အချိန်တွေ ဆုံးရှုံးတတ်ကြပါတယ်။

၅။လူများ

လူတစ်ချို့ဟာလည်း ကျွန်တော်တို့ရဲ့ အချိန်တွေကို ဖြုန်းတတ်ကြပါတယ်။ သင့်ရဲ့နေ့စဉ် ဘဝမှာဖြစ်ဖြစ် ၊ အလုပ်ခွင်မှာပဲ ဖြစ်ဖြစ် အကြောင်းမရှိပဲ စကားလာလာပြောနေတဲ့ လူတွေကို မြင်ရပါလိမ့်မယ်။ ဒီလိုလူတွေ ဟာ သင်နားထောင်ချင်သည် ဖြစ်စေနားမထောင်ချင်သည်ဖြစ်စေ သူတို့ပြောချင်တာတွေကို ပြောတတ်ကြပါတယ်။ဒီအချိန်မှာ သင်ကအားနာလို့ နားထောင်ပြီးစကားပြန်ပြောရင်တော့ သင့်ရဲ့အချိန်ထပ်ကုန်ပြန်ပြီပေါ့။
ဒါတွေဟာ ကျွန်တော်တို့အချိန်တွေကို ဖြုန်းတီးပစ်စေတဲ့ အရာတွေထဲက အချို့ပါပဲ။ ဒီအရာတွေကိုဂရုစိုက်ခြင်းအားဖြင့် ကျွန်တော်တို့ရဲ့ အချိန်တွေကိုရယူပြီး အကျိုးရှိတဲ့နေရာတွေမှာ သုံးနိုင်ကြပါတယ်။