Mr Guanghan ဟာ တရုတ် ၊ ဇီဂျန်းပြည်နယ်က လယ်သမား တစ်ယောက်ဖြစ်ပါတယ်။ ၁၉၉၀ မတိုင်မီကတော့ သူတို့ မိသားစုဟာ အလွန်ပျော်ဖို့ ကောင်းတဲ့ မိသားစု ဖြစ်ခဲ့ပါတယ်။ တစ်နေ့မှာတော့ သူ့ရဲ့ဇနီးဟာ လယ်ထွန်စက်မောင်းရင်း မတော်တဆပြင်းထန်တဲ့ ထိခိုက်မှု ဖြစ်ခဲ့ပါတယ်။ လယ်ထွန်စက်နှစ်စီး တိုက်မိရာက ပြုတ်ကျခဲ့ပြီး ကျောက်ဆောင်နဲ့ထပ်မံတိုက်ခဲ့မှုကြောင့် သူမဟာ ကိုးမားရောဂါကို ခံစားခဲ့ရပါတယ်။
ဒီရောဂါကို ကုသဖို့အတွက် ယွန် ၇၀၀၀၀ ( ဒေါ်လာ ၁၁၀၀၀ ) ခန့်လိုအပ်ပါတယ်။ Mr Guanghan ဟာ သာမန်လယ်သမားတစ်ယောက်သာဖြစ်တဲ့အတွက် ဒီလောက်ငွေကို မတတ်နိုင်ပါဘူး။ ဒီလောက်များပြားလှတဲ့ငွေကိုဘယ်သူမှလည်း မချေးနိုင်ကြပါဘူး။ ဒါကြောင့် Mr Guanghan ဟာ အနီးအနားက အိမ်တွေကို တစ်အိမ်တက် တစ်အိမ်ဆင်းကာ အိမ် ၁၀၀ ကျော်ဆီကနေ နည်းနည်းချင်းစီချေးခဲ့ရာမှာ လိုချင်တဲ့ ငွေကို ရခဲ့ပါတယ်။
ဒီလို ချေးတဲ့အခါမှာ စာအုပ်တစ်အုပ်ယူသွားပြီး အသေအချာမှတ်ထားခဲ့ပါတယ်။ အိမ်နီးချင်းတွေကလည်း Mr Guanghan ဟာ ခင်ဖို့ကောင်းတဲ့ လူတစ်ယောက်ဖြစ်တာကြောင့် ပြန်ဆပ်မဆပ် မသေချာပဲ ချေးခဲ့ကြခြင်းဖြစ်ပါတယ်။
ချေးပြီးတဲ့အခါတိုင်းမှာ Mr Guanghan က တစ်နေ့ သင့်ရဲ့ငွေကို မဖြစ်ဖြစ်အောင်လာဆပ်ပါမယ်လို့ ပြောသွားလေ့ရှိပါတယ်။
ဇနီးဖြစ်သူရောဂါကို ကုသခဲ့ပြီးနောက်မှာတော့ Mr.Guanghan ဟာ ခြိုးခြံသုံးစွဲပြီး ငွေစုပါတော့တယ်။ ဒီလိုနဲ့ နည်းနည်းချင်းစီ ဆပ်သွားရာ ၂၄ နှစ်ပြည့်ပြီးတဲ့အချိန်မှာတော့ ချေးထားသမျှငွေတွေကို တစ်ပြားမကျန် ပြန်ဆပ်လိုက်နိုင်ပါတယ်။ “ရိုးသားယုံကြည်မှုကို ဘာနဲ့မှ မလဲနိုင်ပါဘူး ၊ လော ကမှာ ကြင်နာတတ်တဲ့ သူတွေရှိနေပါလား ဆိုတာကိုသိဖို့ ဒီအကြွေးစာအုပ်ကို ကျွန်တော့်ကလေးတွေကို ပေးခဲ့မှာပါ” လို့ Mr.Guanghan က ဆိုပါတယ်။ တော်ရုံလူ မလုပ်နိုင်လောက်တဲ့ ဇွဲ ၊ ကတိသစ္စာတည်မှုတွေနဲ့ အလွန်လေးစားထိုက်ဖွယ် လူတစ်ယောက်ဖြစ်ပါတယ်။
