အမေရိကန် သမ္မတ ရဲ့ ကျည်ကာဘတ်စ်ကား

Posted on

ရေးသားသူ – စစ်မာန်ဟုန်

အမေရိကန် သမ္မတတွေအတွက် သယ်ယူပို့ဆောင်ရေးမှာ အခက်အခဲ မရှိအောင် ပြင်ဆင်ထားကြပါတယ်။

Air Force One လို့ခေါ်တဲ့ လေယာဉ်၊ Marine One လို့ခေါ်တဲ့ ရဟတ်ယာဉ်နဲ့ The Beast လို့ခေါ်တဲ့ ကားတွေဟာ နောက်ဆုံးပေါ် နည်းပညာကို အသုံးပြုထားတာတွေ ဖြစ်ကြပါတယ်။

အခု ဒီပိုစ့်မှာ အမေရိကန် သမ္မတစီးတဲ့ Ground Force One လို့ခေါ်တဲ့ ဘတ်စ်ကား အကြောင်း တင်ပြသွားပါမယ်။

Ground Force One ဟာ ၄၅ ပေရှည်ပြီး ဒီကားရဲ့ လုံခြုံရေးဆိုင်ရာ ဒီဇိုင်းကိုတော့ သမ္မတရဲ့ ကိုယ်ရံတော်တပ်ဖွဲ့ (Secret Service) က သေချာပြင်ဆင်ပါတယ်။ The Beast လို့ခေါ်တဲ့ ကားလိုပဲ ဒီဘတ်စ်ကား တစ်စီးလုံးကို အနက်ရောင် ဆေးခြယ်ထားပါတယ်။

Ground Force One နဲ့ သူနဲ့ ဆင်တူ ကားတစ်စီးကို တဲနဲဆီပြည်နယ်အခြေစိုက် ဟန်းဖီးလ်ညီအစ်ကိုများ ကုမ္ပဏီကနေ မှာယူထားတာ ဖြစ်ပါတယ်။ ကားတစ်စီးကို ဒေါ်လာ ၁.၁ သန်း တန်ကြေးရှိပါတယ်။ ဒါပေမယ့် ကုန်ထားတာနဲ့ တန်တယ်လို့ ဆိုရမှာပါ။

ဒီကား မဝယ်ခင် အမေရိကန်သမ္မတ ရက်ရှည်ခရီးထွက်ဖို့ ကားအသစ် တစ်စီးငှားရပြီး လုံခြုံရေးအတွက် ပြင်ဆင်ရတာမို့ အသစ်ဝယ်လိုက်တာလို့ သိရပါတယ်။

ဒီဘတ်စ်ကားဟာ ကားတာယာပေါက်သွားရင်တောင် ဆက်သွားလို့ရနိုင်အောင် ပြင်ဆင်ထားပြီး ကျည်ကာ သံပြားတွေနဲ့ အထူးပြုလုပ်ထားတဲ့ မှန်တွေနဲ့ ကာထားပါတယ်။

ဓာတုဗေဒလက်နက်နဲ့ တိုက်ခိုက်လာရင် ကာကွယ်နိုင်ဖို့ အောက်စီဂျင်ဗူးကိုလည်း ထည့်သွင်းထားတဲ့အပြင် သမ္မတရဲ့ သွေးအမျိုးအစား သွေးတွေကိုလည်း ထည့်သွင်းထားပါသေးတယ်။

ဒါ့အပြင် တယ်လီဖုန်း၊ ရုပ်မြင်သံကြား၊ ရေဒီယို အပြင် အင်တာနက်ကိုလည်း ရုံးတစ်ရုံးလို အလုပ်လုပ်နိုင်ဖို့ တပ်ဆင်ထားပါတယ်။

The Beast ကားလိုပဲ သေချာ လေ့ကျင့်ပြင်ဆင်ထားတဲ့ ယာဉ်မောင်းအနည်းငယ်ကသာ ဒီကားကို မောင်းနှင်ခွင့်ရှိပြီး ရွေးချယ်ခံရတဲ့ လူအနည်းငယ်သာ ကားပေါ်တက်စီးခွင့် ရှိပါတယ်။

Ground Force One ဟာ လူအရောက်အပေါက်နည်းတဲ့ ဒေသတွေမှာ သမ္မတကို သက်တောင့်သက်သာနဲ့ လုံလုံခြုံခြုံပို့ပေးနိုင်အောင် ပြင်ဆင်ထားတာ ဖြစ်ပါတယ်။

ပြတင်းပေါက်တွေ အားလုံးကို အနက်ရောင်ပြောင်းထားတဲ့အတွက် လူထုကို လက်ပြနှုတ်ဆက်ဖို့ဆိုရင် သမ္မတက ယာဉ်မောင်းရဲ့ ဘေးမှာ ရပ်ရပါတယ်။

Ground Force One ကားထဲမှာ ဘယ်လို ဒီဇိုင်းရှိသလဲ ဆိုတာ မသိရပေမယ့် အိမ်ဖြူတော်ဝန်ထမ်းတစ်ဦးက ထိုင်ခုံတွေအပြင် ခုံတန်းရှည်တစ်လုံးလည်း ပါဝင်တယ်လို့ ပြောခဲ့ဖူးပါတယ်။

သမ္မတဟာ Air Force One ကနေ Ground Force One ကို ချက်ချင်းသွားနိုင်တာမို့ သယ်ယူပို့ဆောင်ရေးကို ပိုမိုလွယ်ကူစေပါတယ်။

စစ်မာန်ဟုန်