အယ်လင်ဆိုတဲ့သူမအကြောင်း

ရေးသားသူ – နိုင်းနိုင်းစနေ

သူ့ကိုတော့ အွန်လိုင်းပေါ်က ဗီဒီယိုလေးတွေမှာ မကြာခဏတွေ့ဖူးကြမှာပါ။ သူကတော့ Ellen လို့အများက သိကြတဲ့ Ellen Lee Degeneres ပဲ ဖြစ်ပါတယ်။ နာမည်အကျော် အမေရိကန်အစီအစဉ်တင်ဆက်သူ ၊ ဟာသပညာရှင် တစ်ယောက်ဖြစ်သလို သရုပ်ဆောင် ၊ စာရေးဆရာမ နဲ့ ထုတ်လုပ်သူတစ်ယောက်လည်း ဖြစ်ပါတယ်။

Ellen ကို ၁၉၅၈ခုနှစ် ဇန်နဝါရီလ ၂၆ရက်နေ့မှာ အမေရိကန် ၊ လူစီယာနာပြည်နယ် ၊ မန်တိုင်ရီမြို့မှာ speech therapist ဖြစ်သူမိခင် နဲ့ အာမခံအေးဂျင့်ဖြစ်သူ ဖခင်တို့မှ မွေးဖွားခဲ့ပါတယ်။

Ellen ၁၃နှစ်အရွယ်မှာ မိဘတွေကွာရှင်းခဲ့ကြတယ်။ Ellenက မိခင်နဲ့အတူ လိုက်နေခဲ့ပါတယ်။ ကွာရှင်းခြင်းဆိုတဲ့ ရိုက်ခတ်ချက်က မိခင်ကို ပြင်းပြင်းထန်ထန်ထိခိုက်စေခဲ့လို့ ဝမ်းနည်းနာကျင်ခြင်းထဲကနေ မိခင်ရုန်းမထွက်နိုင်ဖြစ်ခဲ့တယ်။ ဒါကို Ellenက ဘယ်လိုနည်းနဲ့ပဲဖြစ်ဖြစ် မိခင်ကို ထပ်တစ်ဖန်ပြုံးရွှင်ရယ်မောအောင်လုပ်မယ်လို့ စဉ်းစားခဲ့မိတယ်။

ဒီလိုနဲ့ Ellenဟာ ရယ်စရာဟာသပုံပြင်တွေလိုက်ရှာဖတ်ပြီး မိခင်ကိုပြောပြခဲ့တယ်။ ဒီလိုပြောပြချိန်မှာ မိခင်ရဲ့အပြုံးကို ခဏသာသူတွေ့ခွင့်ရခဲ့ပါတယ်။

ဟာသပုံပြင်တွေ အပြောများလာတာနဲ့အမျှ တကယ်လို့ ကိုယ့်နံဘေးက လူနဲ့အရာဝတ္ထုတွေကို ဒီလိုဟာသတွေအဖြစ် ဖန်တီးနိုင်ခဲ့ရင် မိခင်ပိုစိတ်ဝင်စားမှာပဲလို့ Ellen သတိထားမိလိုက်တယ်။ အဲဒီလိုတွေးမိပြီးနောက် မိခင်ကို ဟာသပုံစံပြောင်းပြီး သူပြောခဲ့တယ်။ နေ့ရက်တွေ တစ်နေ့ပြီးတစ်နေ့ကုန်ဆုံးသွားခဲ့သလို မိခင်မျက်နှာပေါ်မှာ အပြုံးတွေ များသထက်များလာခဲ့တယ်။

ခရစ္စမတ်ရောက်ပါတော့မယ်။ ကျောင်းမှာ ခရစ္စမတ်ပျော်ပွဲရွှင်ပွဲကျင်းပတော့ Ellenလည်း ပါဝင်ချင်ခဲ့တယ်။ ဒါပေမယ့် သူ့မှာ ဘာစွမ်းရည် ဘာထူးချွန်မှုမှာမရှိဘူးလို့ သူတွေးမိလိုက်တယ်။ မိခင်က “သမီးပြောတဲ့ ရယ်စရာဟာသတွေ အရမ်းကောင်းတယ်၊ သမီးကိုယ်တိုင် မသိဘူးလား”လို့ ပြောတော့ Ellen အံ့သြသွားမိတယ်။ နောက်ရက်မှာပဲ ကျောင်းပျော်ရွှင်ပွဲမှာပါဝင်ဖို့ သူ စာရင်းသွင်းခဲ့ပါတယ်။

အဲဒီညမှာ သူပြောတဲ့ရယ်စရာတွေက အရမ်းအကျိုးထိရောက်ခဲ့ပါတယ်။ ပွဲတစ်ခုလုံး လက်ခုပ်သံတွေ ဟိန်းညံခဲ့တယ်။ အဲဒီနောက်ပိုင်း ကျောင်းမှာ ပျော်ပွဲရွှင်ပွဲရှိတိုင်း Ellenဟာ ရယ်စရာပြောသူအဖြစ် ဖတ်ကြားခံခဲ့ရတယ်။ သူ့ကို “ပွဲဆူစေတဲ့ မှော်မလေး”လို့ တင်စားခဲ့ကြတယ်။

နှစ်တွေတစ်နှစ်ပြီးတစ်နှစ် ကုန်လွန်ခဲ့ပါတယ်။ ဝမ်းနည်းနာကျင်ခြင်းထဲကနေ မိခင်လျှောက်လှမ်းထွက်လာနိုင်ပြီး မိသားစုသစ်တစ်ခုကို ထူထောင်နိုင်ခဲ့တယ်။ အရွယ်ရောက်လာတဲ့ Ellenဟာ အပြင်လောကမှာ ရုန်းကန်လှုပ်ရှားချင်လာခဲ့လို့ ဝန်ထမ်းဘဝထဲ သူစတင်ဝင်ရောက်ခဲ့တယ်။ သူမဟာ အဖျော်ယမကာဖျော်စပ်သူ ၊ စားပွဲထိုး ၊ ရှေ့နေရုံးဝန်ထမ်း ၊ အရောင်းဝန်ထမ်း ၊ အစီအစဉ်တင်ဆက်သူ စတဲ့အလုပ်တွေကို လုပ်ခဲ့ပါတယ်။

ဒါပေမယ့် ကြာလာတာနဲ့အမျှ သူ့အပျော်ရွှင်ဆုံးအချိန်ဟာ သူရယ်စရာတွေပြောပြီးနောက် ပရိသတ်ဆီက လက်ခုပ်သံနဲ့ ရယ်မောသံတွေကို ကြားရတဲ့အချိန်ဖြစ်တယ်ဆိုတာကို Ellen သတိပြုခဲ့မိတယ်။ ဒီလိုနဲ့ အရက်ဘားနဲ့ကော်ဖီဆိုင်တစ်ခုမှာ ဟာသတွေတင်ဆက်ဖို့ သူအလုပ်သွားရှာခဲ့တယ်။ ကော်ဖီဆိုင်မန်နေဂျာက စမ်းသပ်ကြည့်ဖို့ သဘောတူလိုက်ပါတယ်။ လက်ရှိအချိန် ကမ္ဘာမှာ အကျော်ကြားဆုံး အစီအစဉ်တင်ဆက်သူ တစ်ယောက်ဖြစ်ပေမယ့် သူမရဲ့ အစကတော့ ကော်ဖီဆိုင်ငယ်လေး တစ်ခုက စပါတယ်။

ဒီလိုအခွင့်အရေးကို Ellen တန်ဖိုးထားခဲ့ပါတယ်။ ကော်ဖီဆိုင်မှာ လာရောက်စားသောက်သူတွေကို တဝါးဝါး သူပွဲကျစေခဲ့တယ်။ ဒါကို ဆိုင်မန်နေဂျာက သဘောတူပြီး Ellen နဲ့ စာချုပ်ချုပ်ခဲ့ပါတယ်။ ဒါပေမယ့် မန်နေဂျာက Ellenကို အရက်ဘားမှာသီချင်းသီဆိုသူတွေလောက် အလေးမထားခဲ့ပါဘူး။ Ellen က ပွဲဆူအောင်လုပ်ပေးသူ၊ အဓိကဖျော်ဖြေဖို့က အဆိုတော်တွေကိုပဲ အားကိုးရတယ်လို့ထင်ခဲ့တယ်။ “ကျွန်မက ပွဲဆူအောင်ရုံသက်သက် လုပ်ရသူပါ။ ဒါပေမယ့် ကိစ္စမရှိပါဘူး။ ဒီပွဲနွေးထွေးလှုပ်ရှားလာအောင် ကျွန်မအစွမ်းကုန်ကြိုးစားမယ်”လို့ Ellen က သူ့ကိုယ်သူလှောင်ရယ်ပြီး ပြောခဲ့ပါတယ်။

Ellenရဲ့ဖျော်ဖြေမှုက ခဏတွင်းချင်းမှာပဲ လူအများရဲ့လက်ခံမှုကိုရရှိခဲ့တယ်။ သူ့ကိုငြင်းပယ်ခဲ့ဖူးတဲ့ တခြားဆိုင်မန်နေဂျာတွေက သူတို့ဆီမှာလာဖျော်ဖြေဖို့ Ellen ကို ပြန်ကမ်းလှမ်းခဲ့တယ်။ Ellenဟာ ကြိုးစားသူတစ်ဦးပါ။ အဲဒီနောက်မှာတော့ အမေရိကန်နိုင်ငံအဝှမ်းဆီ သူလှည့်လည်ဖျော်ဖြေခဲ့ပါတယ်။

ShowTime တီဗီကုမ္ပဏီက စီစဉ်ကျင်းပတဲ့ ဟာသပြိုင်ပွဲကိုလည်း သူတက်ရောက်ယှဉ်ပြိုင်ခဲ့ပါတယ်။ အဲဒီမှာ ဆုရပြီး ၁၉၈၄မှာ “အမေရိကန်မှာ အရယ်ရဆုံးလူ”အဖြစ် တင်စားခေါ်ဝေါ်ခံခဲ့ရပါတယ်။ သူ့ပရိသတ်တွေက သူ့ကို ဘာဖြစ်လို့ ကိုယ်ပိုင်Talk Show အစီအစဉ်တစ်ခု မလုပ်ရတာလဲလို့ အားပေးခဲ့လို့ ကိုယ်ပိုင်Talk Showတစ်ခုလုပ်ဖို့ သူအတွေးရခဲ့တယ်။

နောက်ဆုံးမှာ သူ့နာမည်ပါတဲ့ Talk Show အစီအစဉ်တစ်ခုကို သူတင်ဆက်နိုင်ခဲ့ပါတယ်။ ဒီကနေ့အထိ အဲဒီ အစီအစဉ်ဟာ seasons ၁၆ခုကျင်းပနိုင်ခဲ့ပြီး သူမဟာ Emmy ဆု ၃၀၊  People’s Choice Awards ဆု ၂၀ ၊ များစွာသောဆုတံဆိပ်တွေအပြင်  အမေရိကန်သမ္မတကနေ ပေးတဲ့ Presidential Medal of Freedom ဆုကိုပါရရှိခဲ့ပြီးသူ ဖြစ်ပါတယ်။

၂ဝ၁၄ခုနှစ် မတ်လမှာကျင်းပခဲ့တဲ့ ၈၆ကြိမ်မြောက် အော်စကာဆုပေးပွဲမှာ Ellen ဟာ အစီအစဉ်တင်ဆက်သူအဖြစ် ပါဝင်ခွင့်ရခဲ့တယ်။ သူဟာ ပွဲဆူသူလို့ သူ့ကိုယ်သူတင်စားခဲ့သလိုပဲ အဲဒီအော်စကာဆုပေးပွဲကို နွေးထွေးလှုပ်ရှားလာအောင် လုပ်နိုင်ခဲ့လို့ အဲဒီပွဲဟာ ၁ဝနှစ်အတွင်းမှာ ကြည့်ရှုသူ Ratings အများဆုံးအဖြစ် စံချိန်တင်ခဲ့ပါတယ်။

လက်ရှိအချိန်မှာ အသက် ၆၁နှစ်ရှိသွားပြီဖြစ်တဲ့သူမရဲ့ ၂၀၁၈ခုနှစ်အထိကြွယ်ဝမှုက ဒေါ်လာ သန်း ၃၃၀ ဖြစ်သလို forbes ရဲ့ကမ္ဘာ့လွှမ်းမိုးမှုအရှိဆုံး အမျိုးသမီး ၅၀ စာရင်းမှာလည်းပါဝင်လာခဲ့တယ်။ LGBT တစ်ယောက်ဖြစ်တဲ့ Ellen ဟာ ၂၀၀၈ခုနှစ်မှာတော့ သြစတြေးလျ-အမေရိကန် မော်ဒယ် Portia de Rossi နဲ့လက်ထပ်ခဲ့ပါတယ်။ ပရဟိတအဖွဲ့အစည်းတွေကို မကြာခဏလှူဒါန်းလေ့ရှိပြီး ပရဟိတပွဲတွေမှာလည်း အမြဲတက်တက်ကြွကြွ နဲ့ပါဝင်လေ့ရှိပါတယ်။ သူကတော့ ဒီကနေ့မှာ ထင်ရှားအောင်မြင်နေတဲ့ Ellen Degeneres ပဲဖြစ်ပါတယ်။

နိုင်းနိုင်းစနေ