နှစ်ပေါင်း ၃၀၀ကျော် သက်တမ်းရှိပြီဖြစ်တဲ့ ရှေးဟောင်းစာကြည့်တိုက်ကြီး

ကမ္ဘာပေါ်မှာ ကြီးကျယ်ခမ်းနားတဲ့ စာကြည့်တိုက်ကြီးတွေ အမြောက်အများရှိတဲ့ အထဲက အိုင်ယာလန်နိုင်ငံက Trinity ကောလိပ်စာကြည့်တိုက်ဟာလည်း နာမည်ကြီးပါတယ်။ ဒီစာကြည့်တိုက်ကတော့ အခြားစာကြည့်တိုက်တွေလို အရမ်းမကြီးမားပေမယ့် ရှေးကျလွန်းတဲ့စာအုပ်ပေါင်းမြောက်များစွာကို ထိမ်းသိမ်းထားတာကြောင့် ကျော်ကြားခြင်းဖြစ်ပါတယ်။ သူ့ကို Old Library လို့လည်းခေါ်ပြီး ဒီအထဲမှာ လူသိအများဆုံးနေရာကတော့ The Long Room လို့ခေါ်တဲ့ အခန်းဖြစ်ပါတယ်။

The Long Room ဟာ အရှည် ၂၁၃ပေ ရှိတဲ့ ခန်းမကြီးတစ်ခုဖြစ်ပြီး ၁၇၁၂ခုနှစ် နဲ့ ၁၇၃၂ခုနှစ်ကြားမှာ တည်ဆောက်ခဲ့တာဖြစ်ပါတယ်။ ဗိသုကာလက်ရာမြောက်ဆောက်လုပ်ထားတဲ့ ဒီအခန်းထဲမှာ စာအုပ်ပေါင်း ၂သိန်းကျော်ကို စာအုပ်စင် အဆင့်ဆင့်နဲ့ သိမ်းဆည်းထားပါတယ်။ ဒီလိုစာအုပ်ပေါင်းများစွာရှိနေရတာကတော့ ဒီစာကြည့်တိုက်ဟာ အိုင်ယာလန် နဲ့ ဗြိတိန်မှာ ပုံနှိပ်တဲ့စာအုပ်တိုင်းကို အခမဲ့တောင်းဆိုခွင့်ရရှိထားလို့ဖြစ်ပါတယ်။

အိုင်ယာလန် နဲ့ ဗြိတိန်က နာမည်ကြီးရှေးဟောင်းစာအုပ်တော်တော်များများကိုသာမက ကမ္ဘာပေါ်မှာရှားပါးတဲ့ စာအုပ်တွေကိုပါ ဒီစာကြည့်တိုက်မှာရှိနေပါတယ်။ ဒီစာအုပ်တွေထဲမှာ အလယ်ေ်ခတ်က အရှားပါးဆုံးစာအုပ်ဖြစ်တဲ့ လက်တင်ဘာသာနဲ့ ရေးထားတဲ့ The Book of Kells လိုစာအုပ်တွေတောင်ရှိနေပါသေးတယ်။ တစ်စောင်တည်းသာ မိတ္တုအဖြစ်ကျန်တော့တဲ့ ၁၉၁၆ခုနှစ် အိုင်းရစ်သမ္မတနိုင်ငံကြေငြာချက်စာတမ်းကလည်း ဒီစာကြည့်တိုက်မှာရှိနေပါတယ်။ အိုင်ယာလန်နိုင်ငံရဲ့ အကြီးဆုံးစာကြည့်တိုက်ကြီးလည်းဖြစ်ပါတယ်။

ဒီစာကြည့်တိုက်ကိုဝင်ရောက်တဲ့အခါ ဘေးတစ်ဖက်တစ်ချက်မှာ စကျင်ကျောက်နဲ့ ထုလုပ်ထားတဲ့ ကိုယ်တစ်ပိုင်းရုပ်တု ၁၄ရုပ်ကို တွေ့ရမှာဖြစ်ပါတယ်။ ၁၇၃၄ခုနှစ်က ထုလုပ်ခဲ့တဲ့ နာမည်ကျော် ဒတ်ချ်ပန်းပုဆရာ Peter Scheemarkers ရဲ့လက်ရာဖြစ်ပြီး နယူတန် ၊ ပလေတို ၊ အရစ္စတိုတယ် ၊ ဖရန်စစ်ဘေကွန် အစရှိတဲ့ ကမ္ဘာကျော် အတွေးအခေါ်ပညာရှင်တွေ နဲ့ ဂန္တဝင်စာရေးဆရာတွေရဲ့ ရုပ်တုတွေဖြစ်ပါတယ်။

ဒါ့အပြင် အိုင်ယာလန်ရဲ့ အမှတ်အသားတစ်ခုဖြစ်တဲ့ ရှေးဟောင်းစောင်းကောက်တစ်လက် နဲ့ အခြားရှေးဟောင်းပစ္စည်းအချို့ကိုလည်း ဒီနေရာမှာပြသထားပါတယ်။ ၁၅ရာစုလက်ရာ ဒီစောင်းကို ဝက်သစ်ချပင်သားနဲ့ ဖန်တီးထားတာဖြစ်ပြီး ကြိုး ၂၉ချောင်း ပါရှိပါတယ်။ ရှေးဟောင်းပစ္စည်း နဲ့ ရှားပါးစာအုပ်ပေါင်းများစွာကို ထိမ်းသိမ်းထားတဲ့ နှစ်ပေါင်း ၃၀၀ကျော် သက်တမ်းရှိတဲ့ ဒီနေရာဟာ အိုင်ယာလန်ရဲ့ခရီးသွားအများဆုံးလာရောက်လေ့ရှိတဲ့ နေရာတွေထဲက တစ်ခုဖြစ်လာခဲ့ပါတယ်။