ကမ္ဘာပေါ်မှာ ကင်းမြီးကောက်မျိုးစိတ်ပေါင်း ၂၀၀၀ ခန့်ရှိပေမယ့် ဒီအထဲက မျိုးစိတ် ၄၀ ခန့်ကသာ အဆိပ်ပြင်းထန်ပါတယ်။ တချို့ကင်းမြီးကောက်တွေရဲ့ အဆိပ်ကတော့ လူကို အသက်အန္တရာယ် ရှိစေနိုင်တဲ့အထိပြင်းထန်ပြီး ဒီအထဲမှာ deathstalker ကင်းမြီးကောက်တွေလည်း ပါဝင်ပါတယ်။ သူတို့ရဲ့အဆိပ်ရည်က အလွန်တန်ဖိုးရှိပြီး ငွေအမြောက်အများ ရရှိနိုင်တဲ့ အရာလည်း ဖြစ်နေပြန်ပါတယ်။
deathstalker ကင်းမြီးကောက်တွေကို ပါလက်စတိုင်း အဝါရောင် ကင်းမြီးကောက် လို့လည်း လူသိများပြီး အာဖရိကမြောက်ပိုင်း ကန္တာရဒေသနဲ့ အရှေ့အလယ်ပိုင်းဒေသတွေမှာ တွေ့ရလေ့ရှိပါတယ်။ အန္တရာယ်ရှိတဲ့ ဒီအကောင်တွေရဲ့အဆိပ်ရည်ဟာ ကမ္ဘာပေါ်မှာ ဈေးအကြီးဆုံး အရည်ဖြစ်နေပြီး အဆိပ်ရည် တဂါလံရဲ့တန်ဖိုးဟာ အမေရိကန်ဒေါ်လာ ၃၉ သန်း ဝန်းကျင်ဖြစ်ပါတယ်။ ပိုက်ဆံရှိနေရင်တောင် အလွယ်တကူဝယ်ယူလို့ မရပါဘူး။ အစက်ကလေးတစက်ရဲ့ တန်ဖိုးဆိုရင်တောင်မှ ဒေါ်လာ ၁၃၀ လောက် ကျသင့်ပါလိမ့်မယ်။
တန်ဖိုးကြီးရခြင်းရဲ့ အဓိကအချက်ကတော့ ရဖို့ အလွန်ခက်ခဲလို့ပါ။ အဲဒီအဆိပ်ကို ရဖို့အတွက် တကောင်ချင်းစီရဲ့အမြီးကနေ ညှစ်ယူရတာဖြစ်ပြီး တကောင်ဆီကနေ အဆိပ်ရည် အများဆုံး ၂မီလီဂရမ်သာ ရယူနိုင်ပါတယ်။ သင်္ချာနည်းနဲ့တွက်မယ်ဆိုရင်တော့ အဆိပ်ရည် ၁ဂါလံရဖို့အတွက် အကြိမ်ပေါင်း ၂သန်းကျော် ညှစ်ယူရမှာ ဖြစ်ပါတယ်။ ဒီကင်းမြီးကောက်ဟာ ကျန်းမာတဲ့ လူတယောက်ကို ကိုက်မိပါက သေစေနိုင်ခြင်း မရှိပေမယ့် အလွန်နာကျင်စေမှာ ဖြစ်ပါတယ်။
ဘယ်လောက်တောင် နာနိုင်သလဲဆိုရင် ပျားတကောင်အတုပ်ခံရတာထက် အဆပေါင်းများစွာ ပိုမိုနာကျင်စေမှာ ဖြစ်ပါတယ်။ အကိုက်ခံပြီးတဲ့နောက် တနေ့လုံး နာကျင်မှုတွေ ပြောပြလို့မရအောင် ခံစားရတယ်လို့ ဆိုကြပါတယ်။
လက်ရှိအချိန်မှာတော့ ဒီကင်းမြီးကောက်တွေရဲ့ အဆိပ်ရည်ကနေ ဆေးဘက်ဆိုင်ရာ အကျိုးပြုမှုတချို့ကိုသာ တွေ့ရှိခဲ့ပြီးဖြစ်ကာ ထပ်မံစမ်းသပ်မှုတွေပြုလုပ်ဖို့အတွက် အဆိပ်ရည်အများအပြား လိုအပ်လျက်ရှိပါတယ်။ အဆိပ်ရည်ကို ပိုမိုမြန်ဆန်စွာ ထုတ်နိုင်မယ့် နည်းလမ်းတွေကိုလည်းကြံဆ လျက်ရှိကာ အဆိပ် ညှစ်ထုတ်ပေးတဲ့စက်ကိုတော့ တီထွင်ပြီးပြီဖြစ်ပါတယ်။ ဒီစက်ဟာ တကြိမ်မှာ ကင်းမြီးကောက်လေးကောင်ကို တပြိုင်တည်း ညှစ်ထုတ်နိုင်သလို ပုံမှန်ညှစ်ထုတ်နေကျထက် ကြာချိန် ၄ဆ ပိုမြန်ပါတယ်။
ဒီကင်းမြီးကောက်ရဲ့အဆိပ်ရည်ဟာ ဆေးဝါးတွေ ဖော်စပ်တဲ့နေရာမှာ အသုံးဝင်ပါတယ်။ ကင်းမြီးကောက်တွေရဲ့ အဆိပ်မှာပါဝင်တဲ့ Chlorotoxin ကို ဦးနှောက်ကင်ဆာ ရောဂါကို ကုသတဲ့နေရာမှာ အသုံးပြုပါတယ်။ အခြားဓာတ်တွေကလည်း အင်ဆူလင်ကို ထိန်းပေးပြီး ဆီးချိုရောဂါကို ကုသတဲ့နေရာတွေမှာလည်း အသုံးပြုကြပါတယ်။ Kaliotoxin ကိုတော့ ကြွက်တွေရဲ့ အရိုးရောဂါတွေကို တွန်းလှန်တဲ့နေရာမှာ စမ်းသပ်ပြီးဖြစ်ကာ လူတွေအတွက်လည်း အကျိုးပြုစေနိုင်မယ်လို့ မျှော်လင့်ထားကြပါတယ်။
Ref:
Business Insider : Scorpion venom is the most expensive liquid in the world
