မူရင်း ရေးသားသူ – Honey Soe
မံမီ စီရင်သူများထဲမှ ခွေးအ ပုံသွင်ရှိတဲ့ အီဂျစ် နတ်ဘုရား အနူးဘစ်ဟာ ငရဲကို ပို့ဆောင်ခံရမယ့် သေသူရဲ့ဝိဉာဉ်ကို စီးနင်းပြီး လားရာကို အရောက် ပို့ပေးတဲ့ နတ် ဖြစ်ပါတယ်။ အနူးဘစ်ဆိုတာ အလောင်းကို မပုပ်သိုးအောင် ဆေးစိမ်တဲ့ အခါမှာ ပသခံရတဲ့ နတ်တစ်ပါးဖြစ်ပါတယ်။
Osiris ရဲ့ အလောင်းကို မပုပ်သိုးအောင် စီရင်ပြီးနောက် ဒုတိယအကြိမ် ရှင်သန်ထမြောက်အောင် အနူးဘစ်က ပြုလုပ်ပေးခဲ့ပါတယ်။ အဲဒီ နောက်မှာတော့ Osiris က အနူးဘစ်ကို နတ်ဘုရားအဖြစ် သတ်မှတ်ပေးပြီး ကိုးကွယ်စေခဲ့ပါတယ်။ သူဟာ Osiris ရဲ့မြေးတော် Nephthys ရဲ့ သားတော် ဖြစ်ပါတယ်။
အနူးဘစ်ရဲ့ ပုံသဏ္ဌာန်ကို ရှေးခေတ် ဘုရင်နဲ့ ဘုရားများ ကိုင်ဆောင်တဲ့ အာဏာစီရင်ခွင့်ရ တောင်ဝှေးကို ကိုင်ထားတဲ့ ခွေးအ,ခေါင်းနဲ့ လူကိုယ်အဖြစ် သရုပ်ဖော်ပြပါတယ်။
တချို့ဒေသတွေမှာတော့ တံကျင် လျှိုခံထားရလို့ သွေးတစ်စက်စက် ယိုကျနေတဲ့ အဖြူ အနက်စပ် နွားထီးကို စီးတဲ့ နတ်အဖြစ်လည်း ပုံဖော်တတ်ပါတယ်။ (အဲဒီ့ နွားစီးတာကတော့ ဘာအဓိပ္ပါယ်မှန်း မသိကြပါ။)
အလောင်းများကို ဆေးစိမ်တဲ့ နေရာမှာ အနူးဘစ်က အထူးကြီးကြပ်သူ ဖြစ်ပါတယ်။ အနူးဘစ်မှာ အရေးကြီးတဲ့ တာဝန် (၃) ခု ရှိပါတယ်။
( ၁) ရွတ်ဖတ်သူရဲ့ အဟန့်ထဲကို မံမီအဟုန်ထည့်ပေးရခြင်း၊
( ၂) နှုတ်ခပတ်တော် ဟခြင်း အခမ်းအနားကို စီရင်ရခြင်း၊
( ၃) ဝိဉာဉ်ကို ကောင်းကင်ဘုံ အမှာကမ်းတဲ့ကွင်းပြင်ဖြစ်စေ၊ ငရဲကိုဖြစ်စေ ပို့ပေးရခြင်း
-တို့ ဖြစ်ပါတယ်။
အရေးအကြီးဆုံးကတော့ အနူးဘစ်ဟာ သေပြီးသူတို့ရဲ့ အမှန်တရားနဲ့ တမလွန်ကို ကြီးကြပ်ရခြင်းပဲ ဖြစ်ပါတယ်။
စီရင်ဆေးစိမ်ထားတဲ့ အလောင်းနားမှာ အမွှေးနံ့သာများ၊ သစ်မွှေးနဲ့ အခြားသဘာဝ အမွှေးနံ့ထွက်တဲ့ အရာတွေ ထားခြင်းဟာ သေသူဝိဉာဉ်ကို စိတ်အာရုံထွေပြားပြီး သူသွားရမယ့် နေရာကို မေ့စေတယ်လို့ ရှေးခေတ် အီဂျစ်များက ယုံကြည်ကြပါတယ်။
အနူးဘစ်က အဲဒီ့လို မေ့မသွားအောင် အထူးကြပ်မတ်ရတဲ့ နတ်ဘုရား ဖြစ်ပါတယ်။
အနူးဘစ်ရဲ့ တာဝန်ဟာ သေပြီးသူရဲ့ ဝိဉာဉ်နဲ့သာ ဆိုင်ပါတယ်။ ရှင်သန်သူများ အနေနဲ့ အနူးဘစ် ရှိကြောင်းကို မံမီ စီရင်နေချိန်မှာပဲ ခံစားရမှာဖြစ်ပြီး မြင်နိုင်စွမ်း မရှိကြပါဘူး။
သေသူတို့၏ ဝိဉာဉ်တွေကို သူတို့ ပြုခဲ့ကြတဲ့ ကောင်းမှု မကောင်းမှု အကျိုး အပြစ်တွေအတွက် စီရင်ခြင်းခံရဖို့ တရား စစ်ဆေးတဲ့ နတ်တရားသူကြီး Osiris ရဲ့ မျက်မှောက် သစ္စာမဏ္ဍိုင် ခန်းမကြီးထဲကို အနူးဘစ်က ခေါ်ဆောင်သွားရပါတယ်။
အဲဒီ့မှာ သေသူရဲ့ ဝိဉာဉ်က မိမိရဲ့ ကောင်းမှု မကောင်းမှုတွေကို လျှောက်ထားပြီးတဲ့အခါ အနူးဘစ်က သေသူရဲ့ အသည်းနှလုံးကို ငှက်ကုလားအုတ် အမွေးနဲ့ ချိန်ခွင်ကို ကိုင်ပြီး ချိန်ရပါတယ်။
အသည်းနှလုံးက ကောင်းမှုတန်ခိုးကြောင့် ပေါ့ပါးနေရင်၊ ချိန်ခွင်မှာ အလေးစီးပြီး စောင်းမသွားရင် ဉာဏ်ပညာနတ် Thoth က မှတ်တမ်းတင်ပြီး Osiris ထံ အစီရင်ခံကာ Osiris က အမတ သုခဘုံထဲကို ဝင်ခွင့်ပြုပါတယ်။
ချိန်ခွင်က သေသူမှာ အပြစ်လေးလံကြောင်း ဖော်ပြရင်တော့ အဲဒီ့အပြစ်အတွက် ပေးဆပ်ရပါတယ်။
အချို့ အယူအဆတွေအရ အဲဒီ့ မကောင်းမှု ပြုခဲ့သူရဲ့ ဝိဉာဉ်ကို ထူးဆန်းတဲ့ သတ္တဝါကြီး Devouress က ဖျက်ဆီးပစ်တယ်လို့ ဆိုပါတယ်။ Devouress ဆိုတာက မိကျောင်းခေါင်း၊ မိကျောင်းပါးစပ်နဲ့၊ ရှေ့ပိုင်းက ခြင်္သေ့ကိုယ်၊ ဖင်ပိုင်းက ရေမြင်းကိုယ် ရှိပြီး Osiris တရားစီရင်တဲ့နားမှာ ဆာလောင်မွတ်သိပ်စွာ စောင့်နေလေ့ရှိပါတယ်။
အပြစ်စီရင်ခံရသူတွေကို ခုန်အုပ်ပြီး ကိုက်စားတတ်ပါတယ်။
အခြား အယူအဆ အရကတော့ အပြစ်ရှိသူရဲ့ ဝိဉာဉ်ဟာ ငရဲကို ပစ်ချခံရပြီး ငရဲမှာ အပြင်းအထန် နှိပ်စက်ခံကြရပါတယ်။
Edited by Ko Kyel Sin (ဗဟုသုတကြယ်စင် ဂရု)
