စမတ်ဖုန်းနည်းပညာအလွန်ထွန်းကားလာတဲ့ ယနေ့ခေတ်မှာ ဂိမ်းတွေကို လူငယ်တွေသာမက လူကြီးတွေထဲမှာလည်း အပြင်းပြေသဘောနဲ့ ဆော့လာကြတဲ့သူတွေလည်း ရှိလာပါပြီ။ ဒီလိုဆော့တဲ့သူတွေထဲမှာ ဂျပန်နိုင်ငံက အဖွားအိုတယောက်ကတော့ ကမ္ဘာ့အသက်အကြီးဆုံး Gaming Youtuber တယောက်အဖြစ် ဂင်းနစ် စံချိန်တင်လိုက်တာပဲ ဖြစ်ပါတယ်။
အဘွားအိုရဲ့ နာမည်ကတော့ Hamako Mori ဖြစ်ပြီး သူမကို ၁၉၃၀ ခုနှစ်က မွေးဖွားခဲ့တာဖြစ်တဲ့အတွက် အသက် ၉၀ အရွယ်ရှိနေပြီဖြစ်ပါတယ်။ Gamer Grandma ဆိုတဲ့ ကိုယ်ပိုင်ယူကျူ့ချန်နယ်တခုကို လွန်ခဲ့တဲ့ ၆နှစ်ကတည်းက ဖွင့်ကာ တောက်လျှောက်ဗီဒီယိုဂိမ်းတွေ ကစားပြခဲ့တဲ့ ဒီအဘွားအိုကို ပြီးခဲ့တဲ့ မေလ ၁၁ရက်နေ့က ကမ္ဘာ့အသက်ကြီးဆုံး ဂိမ်မာ ယူကျူယာအဖြစ် ဂင်းနစ်အဖွဲ့က အသိအမှတ်ပြုလိုက်တာပဲ ဖြစ်ပါတယ်။
တကယ်တော့ အဘွားအိုဟာ ဒီဘက်နှစ်တွေမှ ဂိမ်းစဆော့ခဲ့တာမဟုတ်ပဲ လွန်ခဲ့တဲ့နှစ်ပေါင်း ၃၉နှစ်ကတည်းက စလို့ ဂိမ်းတွေကို စွဲစွဲမြဲမြဲဆော့ခဲ့တဲ့ သက်တမ်းရင့်ဂိမ်းဆော့သူ တယောက်ဖြစ်ပါတယ်။ အဲဒီတုန်းက ကလေးတွေ ဂိမ်းဆော့နေတာကိုကြည့်ရင်း စိတ်ဝင်စားလာရာကနေ ဗီဒီယိုဂိမ်းတွေကို စဆော့ခဲ့တာဖြစ်ပါတယ်။
“သူတို့ဆော့နေတာကိုကြည့်ရတာ ပျော်ဖို့ စိတ်လှုပ်ရှားဖို့ကောင်းတယ်။ ဂိမ်းဆိုတာ ကလေးတွေပဲ ဆော့ရမယ်ဆိုတာကြီးကို ကျွန်မလက်မခံဘူး။ မမျှတဘူးလို့ ထင်တယ်။ ဒါကြောင့် သူတို့ကို ပြန်သင်ခိုင်းပြီး ဆော့တတ်လာတဲ့အခါ ကိုယ့်ဟာကိုယ် ဂိမ်းဆော့နေတော့တာပါပဲ” လို့ သူမက ဆိုပါတယ်။
သူမပထမဆုံး ပိုင်ဆိုင်ခဲ့တဲ့ ဂိမ်းစက်ကတော့ ၁၉၈၁ခုနှစ်ထုတ် Cassette Vision ဆိုတဲ့စက်ပါ။ ဒီစက်ဟာ Nintendo တွေမပေါ်ခင်က လူကြိုက်အများဆုံးဂိမ်းစက်ဖြစ်ခဲ့ပြီး ROM cartridge ထည့်ဆော့ရတဲ့စက်ဖြစ်ပါတယ်။ သူမဟာ ဂိမ်းခွေတွေအများကြီး ဝယ်ယူပြီး ဂိမ်းပေါင်းစုံကို ဆော့ခဲ့ပြီး ဒီလိုဆော့ရတာဟာ သူမဘဝကို ပိုပြီး ပျော်ရွှင်လာစေခဲ့တယ်လို့ အဘွား Mori က ဆိုပါတယ်။
အခုလက်ရှိ သူမဆော့နေတဲ့ ဂိမ်းစက်ကတော့ ဆိုနီကုမ္ပဏီထုတ် PlayStaion 4 ဂိမ်းစက်ဖြစ်ပြီး ဒီစက်နဲ့ဆော့နိုင်ဖို့ အတော်ခက်ခက်ခဲခဲ သင်ယူခဲ့ရတယ်လို့ သိရပါတယ်။ လက်ရှိဆော့နေတဲ့ ဂိမ်းတွေထဲမှာ Grand Theft Auto V ကို အကြိုက်ဆုံးဖြစ်ပြီး ဒီဂိမ်းဆော့ရတာဟာ သူမအတွက် ရုပ်ရှင်ကြည့်ရသလို ခံစားရပြီး စိတ်လွတ်လက်လွတ်ရှိလှပါတယ်တဲ့။
သူမရဲ့ ယူကျူ့ချန်နယ်မှာ Resident Evil , Call of Duty စတဲ့ နာမည်ကြီးဗီဒီယိုဂီမ်းတွေကိုလည်း ဆော့ပြပါသေးတယ်။ သူမဂိမ်းဆော့တဲ့တချို့ ဗီဒီယိုတွေဆိုရင် ကြည့်ရှု့တဲ့အကြိမ်ပေါင်း ၃သန်းကျော် အထိတောင်ရှိနေပါတယ်။ လက်ရှိအချိန်မှာတော့ အဘွား Mori ရဲ့ ယူကျူ့ချန်နယ်ကို အားပေးသူပေါင်း ၂သိန်းခွဲကျော်ကို ပိုင်ဆိုင်ထားပြီး ချန်နယ်ကနေ ဝင်ငွေတွေလည်း ရရှိနေပြီ ဖြစ်ပါတယ်။ သူမဂိမ်းဆော့တဲ့ ဗီဒီယိုတွေကို ယူကျူ့မှာတင်ရခြင်းအကြောင်းကတော့ အခြားဂိမ်မာတွေနဲ့လည်း ဂိမ်းဆော့တဲ့အတွေ့အကြုံချင်း ဖလှယ်ချင်လို့ပါတဲ့။
“တချို့ကတော့ ဒါဟာ အချိန်ဖြုန်းတယ်လို့ အပြစ်တင်ကြပေမယ့် ကျွန်မအတွက်တော့ တခုတည်းသောပျော်ရွှင်မှုပါပဲ။ ကျွန်မ ဒီလောက် အသက်ရှည်ရှည်နေခဲ့ပြီးပြီ ။ ဂိမ်းတွေကို နှစ်ပေါင်းများစွာ ဆော့ခဲ့တာဟာ မှန်ကန်တဲ့ရွေးချယ်မှုလို့ ကျွန်မထင်တယ်။ အခုကျွန်မဘဝက အရမ်းပျော်ရွှင်ဖို့ကောင်းနေတယ်လေ” လို့ နှစ်ပေါင်း ၄၀ နီးပါး ဂိမ်းတွေဆော့လာခဲ့တဲ့ ဂိမ်မာကြီးက ဆိုပါတယ်။
