ရေကူးမသွားပဲ လမ်းလျှောက်သကဲ့သို့ သွားတဲ့ ငါးအမျိုးအစားများကို သြစတြေးလျှ သိပ္ပံပညာရှင်တွေက ပြီးခဲ့တဲ့ ဇန်နဝါရီလ ၂၄ရက်နေ့က တွေ့ရှိခဲ့ခြင်းဖြစ်ပါတယ်။
တွေ့ရှိရတဲ့နေရာကတော့ တက်စ်မေးနီးယား ကမ်းရိုးတန်းက ရေအောက်ကြမ်းပြင်မှာဖြစ်ပါတယ်။
တက်စ်မေးနီးယားဆိုတာ သြစတြေးနိုင်ငံထဲမှာပါဝင်ပြီး ကျွန်းမကြီးရဲ့တောင်ဘက် မိုင် ၁၅၀အကွာမှာ ရှိတဲ့ကျွန်းပါ။
သာယာလှပလွန်းတာကြောင့် သြစတြေးလျရဲ့ဥယျာဉ်လို့ ခေါ်ကြတဲ့ ကျွန်းလည်းဖြစ်ပါတယ်။
အခုတွေ့ရှိရတဲ့ လမ်းလျှောက်ငါးအမျိုးအစားရဲ့ အမည်ကတော့ Red Handfish လို့သိရပြီး ငါးအုပ်တစ်ခုလုံးမှာ အကောင် ၂၀ ဝန်းကျင်ခန့်သာ ရှိတယ်လို့ သိရပါတယ်။
လေ့လာသူ သိပ္ပံပညာရှင်များရဲ့ပြောကြားချက်အရ ဒီငါးအုပ်ဟာ မီတာ ၂၀ မှ မီတာ ၅၀ အကျယ်အဝန်းအတွင်းမှာသာ နေထိုင်ကျက်စားကြတယ်လို့ သိရပါတယ်။
ဒါဟာတင်းနစ်ကွင်း ၂ကွင်းစာပဲ ရှိပါတယ်။ ဒီလိုကျက်စားတဲ့နယ်ပယ် ကျဉ်းမြောင်းရခြင်းကလည်း ဒီငါးအုပ်တွေဟာ အခြားငါးတွေလို ကူးခတ်မသွားပဲ လမ်းလျှောက်သွားတာကြောင့် အကွာအဝေးအများကြီး မသွားနိုင်ဘူး လို့ ဆိုပါတယ်။
ပုံမှန်အားဖြင့် ဒီငါးတွေဟာ ဒိုက်ပင်တွေအောက်မှာ ငြိမ်သက်နေလေ့ရှိပြီး ပုံမှန်ငါးနဲ့မတူတဲ့ လက်တွေလည်း ပါနေပါတယ်။
လမ်းလျှောက်ငါးမျိုးတွေကို တွေ့ရှိတာ ပထမဆုံးတော့မဟုတ်ပါဘူး။ ၁၈၀၀ပြည့်နှစ်မှာတည်းက တက်စ်မေးနီးယားအရှေ့တောင်ပိုင်း က Port Arthur မှာ ပထမဆုံးတွေ့ရှိခဲ့ဖူးပါတယ်။
အလွန်ရှားပါးတဲ့ ငါးအမျိုးအစားဖြစ်ပြီး ၁၀နှစ်မှာ ၁ကြိမ်မြင်ရဖို့တောင် မလွယ်ကူဘူးလို့ သိရပါတယ်။
red handfish ငါးမျိုးတွေဟာ ပုံမှန်အားဖြင့် ၇စင်တီမီတာ ကနေ ၉စင်တီမီတာ ခန့်ရှိပြီး နေထိုင်ကျက်စား ဥဥခြင်းတွေကိုတော့ ပင်လယ်ကြမ်းပြင်က ဒိုက်ပင်တွေရဲ့အောက်ခြေမှာသာ ပြုလုပ်လေ့ရှိကြပါတယ်။
တက်စ်မာနီးယားတက္ကသိုလ် ပင်လယ်ကျောက်တန်းတိုင်းတာရေး သုတေသနအဖွဲ့က သူတို့ရဲ့သုတေသနလုပ်ငန်းတွေဆောင်ရွက်နေစဉ်အတွင်းမှာ ဒီငါးအုပ်ကို တွေ့ရှိခဲ့ကြတာဖြစ်ပါတယ်။
ရှာဖွေတွေ့ရှိခဲ့တဲ့ သိပ္ပံပညာရှင်တွေကတော့ ဒီရှားပါးတဲ့ ငါးမျိုးစိတ်နေထိုင်ရာဝန်းကျင်ကို ကာကွယ်စောင့်ရှောက်ရေးနေရာ အဖြစ်သတ်မှတ်စေချင်ကြပေမယ့် လက်ရှိအချိန်အထိတော့ တရားဝင် မဆွေးနွေးရသေးပါဘူး။
“အခုလို လမ်းလျှောက်တဲ့ငါးမျိုးစိတ်ကို တွေ့လိုက်ရတော့ ကမ္ဘာပေါ်မှာကျွန်တော်တို့ မသိသေးတာတွေ ဘယ်လောက်များများကျန်နေဦးမလဲ ဆိုတာတွေးမိပါတယ်” လို့ သုတေသနခေါင်းဆောင် နဲ့ သိပ္ပံပညာရှင် ဒေါက်တာ Rick Stuart-Smith က ဆိုပါတယ်။
သိပ္ပံပညာရှင်များရဲ့ စစ်တမ်းအရလည်း လက်ရှိအချိန်ထိ ပင်လယ်သမုဒ္ဒရာရေအောက်ရဲ့အကြောင်းကို သိပ္ပံပညာရှင်များရှာဖွေနိုင်တာဟာ ၅% သာ ရှိသေးကြောင်း သိရပါတယ်။ ကျန်တဲ့ အစိတ်အပိုင်း ၉၅% မှာ မသိသေးတဲ့အကြောင်းအရာပေါင်းများစွာ ရှိနေဆဲပါ။
