ဝံပုလွေငါးရှဉ့်(wolf eel ) တွေဟာ ဝံပုလွေငါး( wolffish) မျိုးနွယ်ဝင်ဖြစ်ပြိး ပစိဖိတ်သမုဒ္ဒရာမြောက်ပိုင်းမှာ တွေ့ရလေ့ရှိပါတယ်။ ငါးမျိုးနွယ်ဝင်ဖစ်ပေမယ့် အလွန်ရှည်လျားတဲ့ ခန္ဓာကိုယ်ရှိတာကြောင့် ငါးရှဉ့်နဲ့ပိုတူပြီး Wolf Eel လို့ပေးထားရခြင်းဖြစ်ပါတယ်။
ပုံမှန်အားဖြင့် ၄ပေဝန်းကျင်ခန့်ရှိတတ်ပြီး အရှည်ဆုံးကောင်တွေကတော့ ၇ပေအထိရှိတတ်ပါတယ်။ ပျမ်းမျှအလေးချိန်က ၄၁ပေါင်ဖြစ်ပြီး သူတို့ရဲ့သက်တမ်းကတော့ ၂၅နှစ် ဖြစ်ပါတယ်။ ငါးအများစုကဲ့သို့ သိသာတဲ့အကြေးခွံတွေမရှိပါဘူး။ သူတို့ရဲ့အကြေးခွံတွေဟာ အလွန်သေးပြီး ခန္ဓာကိုယ်ထဲမှာနစ်မြုပ်နေကာ ချောမွေ့နေလေ့ရှိပါတယ်။
ရေအောက်က ဂူတွေထဲ ၊ ကျောက်ဆောင်တွေကြား နဲ့ သန္တာကျောက်တန်းတွေကြားမှာနေထိုင်ကြပြီး ရေအောက် အနက်ပေ ၇၀၀ကျော် အထိသွားရောက်နိုင်ကြပါတယ်။ ဂျပန်ပင်လယ် ၊ Aleutian နဲ့ ကယ်လီဖိုးနီးယားတောင်ပိုင်းတွေမှာ ရံဖန်ရံခါတွေ့ရတတ်ပါတယ်။ ပုံမှန်အားဖြင့်တော့ လူတွေကို အန္တရာယ်ပြုလေ့မရှိပါဘူး။ ဒါပေမယ့် ရံဖန်ရံခါတော့ ကိုက်တတ်ပြီး အဲဒီအခါမျိုးမှာ အလွန်အမင်းနာကျင်စွာခံစားရတတ်ပါတယ်။
ကူးခေတ်ရာမှာ အလွန်နှေးကွေးပြီး ရေငုပ်သူတွေနဲ့ အကျွမ်းတဝင်ရှိတဲ့ငါးတွေဖြစ်ပါတယ်။ အထီး အမ နှစ်ကောင်အမြဲတပူးပူးတတွဲတွဲနေလေ့ရှိပါတယ်။ ဥတွေဥတဲ့အခါမျိုးမှာတော့ တစ်ကောင်က ဥတွေကိုစောင့်ရှောက်ပြီး ကျန်တစ်ကောင်က အစာသွားရှာလေ့ရှိပါတယ်။ တစ်ခါဥရင် ဥပေါင်း ၁သောင်းဝန်းကျင်ခန့်ဥတတ်ပြီး ဥပေါက်ဖို့တော့ ၁၃ပတ်ကနေ ၁၆ပတ်ခန့်ကြာလေ့ရှိပါတယ်။
ပုဇွန်ထုပ် ၊ သံပခြုပ်ကောင် ၊ ဂုံး နဲ့ ငါးအသေးစားလေးတွေဟာ သူတို့ရဲ့အစာဖြစ်ပါတယ်။ အလွန်သန်မာတဲ့သွားနဲ့ ခိုင်ခန့်တဲ့မေးရိုးတွေနဲ့ အစာတွေကို ကြိတ်ချေစားလေ့ရှိပါတယ်။ ဒီငါးတွေရဲ့ပုံစံဟာ အလွန်ကြောက်မက်ဖွယ်ရာဖြစ်ပေမယ့် လူတွေကတော့ အစားအစာတစ်ခုအဖြစ် ချက်ပြုတ် စားသောက်လေ့ရှိပါတယ်။
အမေရိကအနောက်မြောက်ပိုင်းကမ်းရိုးတန်းက လူမျိုးစုတွေကတော့ ဒီငါးတွေကို ဆရာဝန်ငါးလို့ခေါ်လေ့ရှိပါတယ်။ သူတို့ရဲ့ရိုးရာဆေးဆရာတွေက ဒီငါးတွေဟာ ရောဂါတွေကို ပျောက်ကင်းဖို့ အထောက်အကူပေးတာကြောင့် များများစားဖို့ တိုက်တွန်းလေ့ရှိပါတယ်။
VIDEO
