ပိရမစ်တွေကို တည်ဆောက်ခဲ့သူ ဘုန်းတော်ကြီး အင်မ်ဟိုတက်

Imhotep အင်မ်ဟိုတက် ဟာ ဘီစီ ၂၇ ရာစုဝန်းကျင်က ရှေးဟောင်းအီဂျစ်ပြည်မှာပေါ်ထွန်းခဲ့တဲ့ စွယ်စုံရပညာရှင်ကြီးတစ်ယောက်ဖြစ်ပါတယ်။ သူ့ရဲ့အထင်ရှားဆုံးအရာကတော့ အီဂျစ်ဖာရိုဘုရင် Djoser ရဲ့ ပိရမစ်ကို တည်ဆောက်ခဲ့ခြင်းပါ။

Saqqara အရပ်မှာ တည်ဆောက်ခဲ့တဲ့ ဒီ Djoser ပိရမစ်ဟာ လှေကားထစ်များပုံစံဖြစ်နေတဲ့အတွက် လှေကားထစ် ပိရမစ်(Step Pyramid) လို့လည်းခေါ်ကြပါတယ်။ အီဂျစ်ပိရမစ်တွေထဲမှာ ရှေးအကျဆုံးဖြစ်တဲ့ ဒီပိရမစ်ကို လွန်ခဲ့တဲ့နှစ်ပေါင်း ၅၀၀၀ နီးပါးကတည်ဆောက်ခဲ့တဲ့အတွက် Imhotep ကို ရှေးအကျဆုံး ဗိသုကာပညာရှင်တစ်ယောက်အဖြစ် သတ်မှတ်ခဲ့ကြပါတယ်။

Imhotep ဆိုတဲ့အမည်ရဲ့ အဓိပ္ပါယ်က “ငြိမ်းချမ်းဖို့အတွက်ရောက်လာသူ” ဖြစ်ပါတယ်။ သူဟာ လူသားကနေ နတ်အဖြစ်ကိုးကွယ်ခံရတဲ့ တစ်ဦးတည်းသော အီဂျစ်သားလည်းဖြစ်ပါတယ်။

သူ့ကို သူကွယ်လွန်ပြီး နှစ် ၂၀၀၀ ကျော်မှာ ဉာဏ်ပညာနှင့် ဆေးပညာ နတ်ဘုရားအဖြစ် အီဂျစ်တွေက ကိုးကွယ်ခဲ့ကြပါတယ်။ အစဉ်အဆက်ကိုးကွယ်ခဲ့ကြရာ ရောမအင်ပါယာဘုရင်တွေဖြစ်တဲ့ Tiberius နဲ့ Claudius တို့လက်ထက်တိုင် ကျောင်းဆောင်တွေနဲ့ Imhotep ကို ကိုးကွယ်ခဲ့ကြပါတယ်။

သူဟာ ဘုန်းတော်ကြီးတစ်ပါးဖြစ်သလို အဲဒီအချိန်က အီဂျစ်ဘုရင်ဖြစ်တဲ့ Djoser ရဲ့ အဆင့်အမြင့်ဆုံး အကြံပေးအရာရှိလည်းဖြစ်ပါတယ်။ သူ့ကို Djoser ပိရမစ် တည်ဆောက်သူလို့သာ အများစုသိထားကြပေမယ့် သူဟာ ဆေးဆရာ ၊ သင်္ချာပညာရှင် ၊ ကဗျာဆရာ ၊ ပန်းပုဆရာ၊ နက္ခတ်ဗေဒပညာရှင် တစ်ယောက်လည်း ဖြစ်ပါတယ်။

သူချန်ထားခဲ့တဲ့ papyrus တွေမှာ ဒါဏ်ရာပေါင်း ၄၈ မျိုးရဲ့ ကုသနည်းတွေကိုရေးသားထားပြီး အဲဒီထဲက ၂၇မျိုးက ဦးခေါင်းပိုင်းဆိုင်ရာတွေဖြစ်ပြီး ၆ မျိုးက ကျောရိုးပိုင်းဆိုင်ရာရောဂါ ကုသနည်းတွေဖြစ်ပါတယ်။ (Papyrus ဆိုတာ ရှေးခေတ်အီဂျစ်ပြည်မှာ အသုံးပြုခဲ့တဲ့ ပင်စည်တုတ်တဲ့ ကျူပင်နဲဖန်တီးထားတဲ့ စက္ကူသဖွယ် ရေးမှတ်စရာကို ဆိုလိုပါတယ်)

သူဟာ ရုပ်ရှင်တွေထဲမှာတော့ သေဆုံးခြင်း နဲ့ ရှင်သန်ခြင်းနတ်ဘုရား Osiris ၊ အနုဘစ် တို့နဲ့ ဆက်စပ်နေသူဖြစ်ပေမယ့် အပြင်မှာတော့ နေနတ်ဘုရား Ra နဲ့ ဗိသုကာနတ်ဘုရား Ptah တို့ကို ကိုးကွယ်သူ ဘုန်းတော်ကြီးတပါးသာ ဖြစ်ပါတယ်။ သူ့ကို ဗိသုကာနတ်ဘုရား Ptah ရဲ့သားတော်လို့လည်း ခေါ်ခဲ့ကြပါသေးတယ်။

သူ့ကို အီဂျစ်မြို့တော် Memphis အနီးက Ankhtowe ဒေသမှာ မွေးဖွားခဲ့ပါတယ်။ သူဟာ သာမန်မျိုးရိုးမှ ဆင်းသက်လာသူဖြစ်ပေမယ့် ထူးချွန်လွန်းတဲ့ သူ့ရဲ့အတတ်ပညာပေါင်းစုံကြောင့် ဘုရင်ရဲ့ ချီးမြှောက်ခြင်းကို ခံခဲ့ရသူပါ။

Imhotep ကို သူ့ခေတ်သူ့အခါက သိပ္ပံပညာနဲ့ ဘာသာရေးကို ချိန်ညှိပေးသူလို့ ဆိုနိုင်ပါတယ်။ တစ်ဖက်က ဘာသာရေးဆိုင်ရာ ပုဂ္ဂိုလ်တစ်ယောက်ဖြစ်ပေမယ့် တစ်ဖက်ကတော့ သိပ္ပံနည်းကျ လက်တွေ့ရောဂါ ကုသပေးတဲ့ သမားတော်ဖြစ်ပါတယ်။

သူ့ကိုဂုဏ်ပြုတဲ့အနေနဲ့ အမေရိကန် ရှီကာဂိုမြို့မှာရှိတဲ့ နိုင်ငံတကာ ခွဲစိတ်မှုဆိုင်ရာ ကောလိပ်ရဲ့ ခန်းမမှာ Imhotep ရုပ်တုကို ထားရှိပေးထားပါတယ်။

Imhotep သေဆုံးသွားပြီးတဲ့နောက် သူ့ကိုဘယ်နေရာမှာ ထားရှိသဂြိုဟ်ခဲ့တယ်ဆိုတာကို ဘယ်သူမှ မသိကြပါဘူး။ တချို့ကတော့ Saqqara အရပ်ထဲက တစ်နေရာရာမှာရှိနိုင်ပြီး တချို့ကတော့ သူတည်ဆောက်ခဲ့တဲ့ လှေကားထစ်ပိရမစ်ရဲ့အောက်မှာ ရှိနိုင်တယ်လို့ ယုံကြည်နေကြပါတယ်။ လှေကားထစ်ပိရမစ်ဝန်းကျင်မှာ Imhotep ရဲ့ဂူကို နည်းမျိုးစုံနဲ့ ရှာဖွေနေကြတဲ့ သုတေသနပညာရှင်တွေလည်း ယနေ့ထက်တိုင် ရှိနေပါသေးတယ်။