ယနေ့ ကမ္ဘာ့အကြီးဆုံးနည်းပညာကုမ္ပဏီတစ်ခုဖြစ်တဲ့ မိုက်ခရိုဆော့ဖ်ကို လွန်ခဲ့တဲ့နှစ်ပေါင်း ၄၄နှစ် ၁၉၇၅ ခုနှစ်တုန်းက ဘီဂိတ်စ် နဲ့ သူငယ်ချင်းဖြစ်သူ Paul Allen တို့က တည်ထောင်ခဲ့ကြတာဖြစ်ပါတယ်။ အခုတော့ Paul Allen လည်း မရှိတော့သလို ဘီဂိတ်စ်ကလည်း ကုမ္ပဏီဘုတ်အဖွဲ့ကနေ နှုတ်ထွက်လိုက်ပြီဖြစ်ကြောင်း ပြီးခဲ့တဲ့သောကြာနေ့က ကြေညာခဲ့ပါတယ်။
ဘီဂိတ်စ်ဟာ နှစ်ပေါင်း ၂၀ကျော်ကြာ မိုက်ခရိုဆော့ဖ်ကုမ္ပဏီကို စီးအီးအိုအဖြစ် ဦးစီးလုပ်ကိုင်ခဲ့ပြီး ၂၀၀၀ ခုနှစ်မှာတော့ စီးအီးအိုရာထူးကို Steve Ballmer ထံလွှဲပြောင်းပေးခဲ့ပါတယ်။ အဲဒီနောက်တော့ ကုမ္ပဏီဥက္ကဌတဖြစ်လဲ Software Architect ချုပ်အဖြစ် လုပ်ကိုင်နေခဲ့ရာကနေ သူ့ရဲ့လုပ်ငန်းတာဝန်များကို တဖြည်းဖြည်းလျော့ချခဲ့ပြီး ဘုတ်အဖွဲ့ဝင် အကြံပေးတယောက်အဖြစ်သာ နောက်ကွယ်က ရပ်တည်ခဲ့တာပါ။ အခုတော့ ဘုတ်အဖွဲ့ကနေပါ နှုတ်ထွက်လိုက်ပြီဖြစ်ပါတယ်။
ဒီလိုနှုတ်ထွက်လိုက်ရခြင်း အကြောင်းကတော့ ပရဟိတလုပ်ငန်းတွေကိုပဲ ဇောက်ချလုပ်ချင်လို့လို့ ဘီဂိတ်စ်က ဆိုပါတယ်။ ဘီဂိတ်စ်ဟာ ဒီမတိုင်ခင်ကလည်း မိတ်ဆွေဖြစ်သူ ဝါရင်းဘတ်ဖတ်ရဲ့ Berkshire Hathaway ကုမ္ပဏီဘုတ်အဖွဲ့ကနေ နှုတ်ထွက်ခဲ့ပါသေးတယ်။
ဘီဂိတ်စ်ဟာ ၂၀၀၀ ခုနှစ်ကတည်း ကမ္ဘာ့အကြီးဆုံးဖောင်ဒေးရှင်းတခုဖြစ်လာမယ့် Bill & Melinda Gates ဖောင်ဒေးရှင်းကိုတည်ထောင်ခဲ့ပြီး ကုမ္ပဏီလုပ်ငန်းနဲ့ အတူ ပရဟိတကို တွဲဖက်လုပ်ခဲ့တာဖြစ်ပါတယ်။ အခုတော့ ပရဟိတလုပ်ငန်းကို ဇောက်ချလုပ်တော့ဖို့ ဆုံးဖြတ်ပြီး ကုမ္ပဏီအလုပ်တွေကနေ နှုတ်ထွက်လိုက်တာဖြစ်ပါတယ်။
“ပရဟိတကို ဦးစားပေးလုပ်နေတဲ့အတွက် Berkshire နဲ့ မိုက်ခရိုဆော့ဖ် ကုမ္ပဏီတွေမှာ ကောင်းကောင်းဦးဆောင်မှု မပေးနိုင်ခဲ့ဘူး။ အခုတော့ နှုတ်ထွက်ပြီး ကမ္ဘာလုံးဆိုင်ရာ ကျန်းမာရေး ၊ ဖွံ့ဖြိုးရေး ၊ ပညာရေး နဲ့ ရာသီဥတုပြောင်းလဲမှု ဆိုင်ရာကိစ္စတွေကိုပဲ လုပ်ပါတော့မယ်” လို့ ဂိတ်စ်က ဆိုပါတယ်။
ရာထူးကနှုတ်ထွက်လိုက်ပေမယ့် ကျွန်တော်ကုမ္ပဏီကို ခွဲမသွားပါဘူး။ မိုက်ခရိုဆော့ဖ်ဟာ ကျွန်တော့်ရဲ့ အရေးပါတဲ့ အခန်းကဏ္ဍက ရှိနေဆဲပါ။ ကုမ္ပဏီအဖွဲ့ဝင်တွေကို လေးစားသမှုနဲ့ နှုတ်ထွက်ခဲ့တာဖြစ်ပြီး လက်ရှီစီအီးအိုဖြစ်တဲ့ Satya Nadella ရဲ့ခေါင်းဆောင်မှုနဲ့အတူ ရှေ့ဆက်သွားမှာဖြစ်တယ် လို့ ဂိတ်စ်က ဆိုပါတယ်။
ဘီလ်ဂိတ်ဟာ အမေဇုန် ဝက်ဘ်ဆိုက်တည်ထောင်သူ ဂျတ်ဘီးဇော့ ပြီးရင် ကမ္ဘာ့ဒုတိယအချမ်းသာဆုံးအဖြစ် ပိုင်ဆိုင်မှု ဒေါ်လာ ၁၁၂ ဒသမ ၈ ဘီလီယံ ကြွယ်ဝသူဖြစ်ပြီး ကမ္ဘာပေါ်က လိုအပ်တဲ့ ကျန်းမာရေး ၊ ပညာရေး နယ်ပယ်အသီးသီးမှာ ဘီလျံပေါင်းများစွာ လှူဒါန်းကာ လူသန်းပေါင်းများစွာကို ကယ်တင်နေသူ တဦးလို့လည်း ဆိုနိုင်ပါတယ်။
လတ်တလော ကမ္ဘာကို ဒုက္ခပေးလျက်ရှိတဲ့ ကိုရိုနာဗိုင်းရပ်စ် ကာကွယ်ဆေး သုတေသနအတွက်လည်း အမေရိကန်ဒေါ်လာ သန်း ၅၀ လှူဒါန်းထားပါသေးတယ်။
