နာဇီတို့ကို ကြောက်လန့်စေခဲ့တဲ့ အမျိုးသမီး ဖိုက်တာများ (သို့) ညဉ့်စုန်းမများ

Posted on

ဒုတိယ ကမ္ဘာစစ်အတွင်းက နာဇီတို့ ကြောက်လန့်ခဲ့ရတဲ့ ဆိုဗီယက် အမျိုးသမီး Fighter Pilot အဖွဲ့တစ်ဖွဲ့ရှိခဲ့ပါတယ်။ ဘယ်လောက်ထိကြောက် လန့်သလဲ ဆို သူတို့ထဲက လေယာဉ်တစ်စီးကို ပစ်ချနိုင်သူတိုင်းကို Iron Cross (ဂျာမန်တွေရဲ့ အထွဋ်အထိပ် ဆုတံဆိပ်) လို့ခေါ်တဲ့ ဆုတံဆိပ် ချီးမြင့်ခံရတဲ့အထိ ကြောက်လန့်ပါတယ်။

ဒီအဖွဲ့ရဲ့နာမည်ကိုတော့ Night Witches (ညဉ့်စုန်းမများ) လို့ ဂျာမန်တွေက အမည်ပေးထားပါတယ်။ ဒီအဖွဲ့ကို ဆိုဗီယက်ယူနီယုံရဲ့ ခေါင်းဆောင်ဖြစ်သူ စတာလင်(Joseph Stalin) ရဲ့ အမိန့်နဲ့ ရရှားရဲ့ Amelia Earhart လို့ခေါ်ကြတဲ့ အမျိုးသမီးဗိုလ်မှူးကြီး Marina Raskova နောက်အမျိုးသမီး ဗိုလ်မှူး တစ်ယောက်ဖြစ်တဲ့ Yevdokia Bershanskaya တို့က ဦးဆောင် ဖွဲ့စည်းခဲ့ပါတယ်။ သူတို့ရဲ့အဖွဲ့ကို 588th Night Bomber Regiment လို့ခေါ်ပြီး နောက်ပိုင်း 46th “Taman” Guards Night Bomber Aviation Regiment အဖွဲ့အဖြစ်လူသိများပါတယ်။

ဒီအဖွဲ့မှာပါဝင်ဖို့ အမျိုးသမီးတပ်သားတွေကို Raskova ဟာ ခက်ခက်ခဲခဲ ကြိုးပမ်းစည်းရုံးခဲ့ရပါတယ်။ သူ့ရဲ့စည်းရုံးမှု နဲ့ ဦးဆောင်မှုရဲ့အောက်မှာ ဒီအမျိုးသမီးသီးသန့်အဖွဲ့ဟာ အောင်ပွဲအလီလီ ရရှိခဲ့ပါတယ်။ ဒီအဖွဲ့မှာလေသူရဲ၊ မကင်းနစ်၊ ဗိုလ်တွေ အားလုံးဟာ အသက် ၁၇နှစ်ကနေ ၂၆ နှစ်အတွင်းရှိတဲ့ အမျိုးသမီးတွေချည်းပဲ ဖြစ်ပါတယ်။ သူတို့ဟာ တိုင်းပြည်အတွက် အသက်စွန့်ကြိုးစားခဲ့ကြသူတွေဖြစ်ပေမယ့် လုံလောက် တဲ့ထောက်ပံ့မှုတော့ မရခဲ့ပါဘူး။

ဆံပင်ကို တိုတိုညှပ်၊ ဖိနပ် က အစ ဦးထုပ်အဆုံး သူတို့နဲ့မတော်တဲ့ စစ်သားတွေရဲ့ ဝတ်စုံဟောင်းတွေကို ဝတ်ဆင်ခဲ့ရပါတယ်။ သူတို့ကိုပေးသုံးတဲ့ လေယာဉ်တွေကလည်း Polikarpov Po-2 လို့ခေါ်တဲ့ လေယာဉ်အစုတ်တွေပဲ ဖြစ်ပါတယ်။ ဒါပေမယ့် သူတို့ဟာ စစ်ပွဲတလျောက် အခါပေါင်း ၃၀၀၀၀လောက်ပျံသန်းခဲ့ပြီး အလေးချိန် တန် ၂၃၀၀၀ လောက်ရှိတဲ့ ဗုံးတွေကို ရန်သူတွေဆီ ပစ်ချနိုင်ခဲ့ပါတယ်။

အမျိုးသမီးတွေဆိုသော်ငြား အမျိုးသားတွေနဲ့ရင်ဘောင်တန်းကာ လပေါင်းများစွာ မရပ်မနားပဲ ရန်သူကို ဇွဲကောင်းကောင်းနဲ့တိုက်ခဲ့ပါတယ်။ စစ်ကြီးအပြီးမှာတော့ Night Witches (ညဉ့်စုန်းမများ) အဖွဲ့မှ လေယာဉ်မှူး အယောက် ၃၀ ကျဆုံးခဲ့ပြီး ကျန်ခဲ့တဲ့ Popova အပါအဝင် အမျိုးသမီး ၂၃ ယောက်ဟာ ဆိုဗီယက် ဂုဏ်ထူးဆောင် သူရဲကောင်းများအဖြစ် ဆုချီးမြှင့်ခံခဲ့ရပါတယ်။

Night Witches (ညဉ့်စုန်းမများ) အဖွဲ့မှာ အကောင်းစားလေယာဉ်တွေ၊ အလွန်အစွမ်းထက်တဲ့ဗုံးတွေ၊ နောက်ဆုံး ပုံမှန်ထောက်ပံမှုဖြစ်တဲ့ အဝတ်အထည်တွေတောင် ကောင်းကောင်းမွန်မွန် မရှိခဲ့ပေမယ့် သူတို့ဟာ သူတို့ရဲ့အကြောက်အလန့်မရှိတဲ့ သတ္တိ၊ ခိုင်မာတဲ့ဇွဲနဲ့ အမျိုးသမီးတွေ ရဲ့အစွမ်းကို ပြသခဲ့ပါတယ်။ ဒါကြောင့်လည်း အမျိုးသမီးများသာ ဖြစ်ပေမယ့် ဒုတိယကမ္ဘာစစ်ရဲ့ အကောင်းဆုံးတပ်ဖွဲ့တွေထဲက တစ်ဖွဲ့အဖြစ် သမိုင်းမှတ်တမ်း အတင်ခံခဲ့ရပါတယ်။