တွေ့ရှိသူတိုင်း ပဟေဠိဖြစ်ခဲ့ရတဲ့ ၁၆ရာစု ဘုရားကျောင်းနံရံပေါ်က အာကာသလူသားရုပ်ရဲ့အဖြေ

Posted on

စပိန်နိုင်ငံ Salamanca မြို့မှာ အဓိက ဘုရားရှိခိုးကျောင်းနှစ်ခုရှိပါတယ်။ ဒီအထဲက Vieja ဘုရားရှိခိုးကျောင်းဟာ ၁၂ရာစု အလယ်ပိုင်းလောက် ကတည်းက တည်ဆောက်ခဲ့တာဖြစ်ပြီး ဥရောပရဲ့ ရှေးအကျဆုံး ဘုရားကျောင်းတွေထဲက တစ်ခုအပါအဝင် ဖြစ်ပါတယ်။ နောက်ဘုရားရှိခိုးကျောင်းနာမည်က Nueva ဖြစ်ပါတယ်။ ပထမတစ်ခုကို ဘုရားရှိခိုးကျောင်းဟောင်း ၊ ဒုတိယ တစ်ခုကို ဘုရားရှိခိုးကျောင်းသစ်လို့ ခေါ်ကြပါတယ်။ ဘုရားရှိခိုးကျောင်းသစ်လို့ခေါ်ပေမယ့် ၁၆ရာစု ဝန်းကျင်က တည်ဆောက်ခဲ့ပြီး ၁၈ရာစုဝန်းကျင်မှာ ပြီးဆုံးခဲ့ပါတယ်။

ဘုရားရှိခိုးကျောင်းသစ် Nueva ဟာ အလွန်လက်ရာမြောက်ပြီး များပြားလှတဲ့ အလှအပ ကျောက်ရုပ်များစွာကို နံရံပေါ်မှာ ထွင်းထုထားပါတယ်။ ဒီအထဲမှာ အထူးခြားဆုံး အရုပ်တစ်ရုပ် ရှိပါတယ်။ အဲဒါကတော့ ယနေ့ခေတ် အာကာသဝတ်စုံကို ဝတ်ဆင်ထားတဲ့လူသားနဲ့ ချွတ်စွပ်တူတဲ့ ရုပ်တုဖြစ်ပါတယ်။ အာကာသဝတ်စုံ ဝတ်ထားတဲ့လူသားဟာ အကာသရဲ့ ဆွဲအားနည်းပါးမှုကြောင့် မျောလွင့်နေဟန်ပါ။ ဒီအရုပ်ဟာ အာကာသလူသားတွေမှာ ရှိသင့်တဲ့ ဖိနပ် ၊ ဦးထုပ် ၊ ကျောမှာပိုးထားပြီး ရှေ့အင်္ကျီနဲ့ဆက်ထားတဲ့ အသက်ရှု ကိရိယာဘူး တွေသာမက ဖိနပ်အောက်ဘက်ခွာက အစ ၂၀ရာစုနောက်ပိုင်း အာကာသဝတ်စုံ ဝတ်ထားတဲ့သူနဲ့ ချွတ်စွပ်တူနေပါတယ်။

၁၆ရာစုက ရုပ်တုဟာာ ဘာကြောင့် ၂၀ရာစုမှာမှ ရှိတဲ့ အာကာသလူသားနဲ့ ချွတ်စွပ် တူနေရတာလဲ ဆိုတဲ့ ပြသနာဟာ ပညာရှင် အတော်များများကိုခေါင်းခဲစေခဲ့ပါတယ်။ အင်တာနက်ပေါ်မှာလည်း မကြာခဏပျံနှံ့လေ့ရှိပြီး လူတွေကို စဉ်းစားမရစေနိုင်တဲ့ မေးခွန်းတစ်ခုလည်းဖြစ်ပါတယ်။

တကယ်တော့ ဒီပြသနာရဲ့အဖြေဟာ ရိုးရှင်းလွန်းလှပါတယ်။ ဘုရားကျောင်းဟာ ၁၆ရာစုက လက်ရာဆိုတာ မှန်ပါတယ်။ ဒါပေမယ့် လူသိနည်းကြတဲ့အကြောင်းကတော့ ဒီဘုရားကျောင်းကို ၁၉၉၂ခုနှစ်တုန်းက ပြန်လည် ထိမ်းသိမ်းပြုပြင်ရေးတွေလုပ်ခဲ့တယ် ဆိုတာပါ။ Jeronimo Garcia ရဲ့ဦးဆောင်မှု နဲ့ပြုလုပ်ခဲ့ပြီး ဒီအထဲမှာ ကျောက်ဆစ် ပန်းပုပညာရှင် Miguel Romero လည်း ပါဝင်ပါတယ်။

သူတို့အဖွဲ့ဟာ ၁၆ရာစုက ဘုရားကျောင်းကို ၂၀ရာစုမှာ ပြန်ပြင်ခဲ့တယ်ဆိုတဲ့ သင်္ကေတ တစ်ခုအနေနဲ့ ထူးခြားမှုတွေကို ပြုလုပ်ခဲ့ပါတယ်။ ဒါကတော့ လူတွေကို ခေါင်းခဲစေတဲ့ အာကာသဝတ်စုံ နဲ့ လူသားရုပ်ကို ထည့်သွင်းခဲ့တာပါ။ ဒါတင်မကသေးပါဘူး။ ဘုရားကျောင်းမျက်နှာစာမှာ ရှိတဲ့ ပုံပန်းမကျတဲ့ အရုပ်တစ်ရုပ်ကိုလည်း ရေခဲမုန့်စားနေဟန် ထည့်သွင်းခဲ့ပါသေးတယ်။ လူတွေကို ခေါင်းရှုပ်စေခဲ့တဲ့ အဓိက တရားခံတွေဖြစ်ပါတယ်။