ဆလော့(Sloth) ဆိုတဲ့အကောင်ငယ်လေးတွေကို ကာတွန်းကားကြည့်တဲ့သူဆိုရင် မကြာခဏမြင်ဖူးပါလိမ့်မယ်။ Zootopia ကြည့်ဖူးတဲ့သူဆို ရင်းနှီးမှာ အသေအချာပါ။ သွားလာလှု့ပ်ရှားရာမှာ အလွန်နှေးကွေးလွန်းပြီး အအိပ်ကြီးလွန်းတာကြောင့် ငပျင်းလေးတွေလို့လည်း ဆိုကြပါတယ်။ မြန်မာလိုဆိုရင်တော့ Sloth ကို မျောက်မောင်းမ(မျောက်ပျင်း) လို့ခေါ်မယ် ထင်ပါတယ်။
ဆလော့ကို ကျွန်တော်တို့သိကြတာက တစ်မျိုးတည်းဖြစ်ပေမယ့် တကယ်က ဆလော့က ၆မျိုးရှိပါတယ်။ အဓိကအုပ်စုကြီးကတော့ နှစ်ခုပါ။ Two-toed Sloth နဲ့ Three-toed Sloth ဆိုပြီးတော့ပါ။ လက်ချောင်း နှစ်ချောင်း နဲ့ သုံးချောင်းပါတဲ့ အကောင်ဆိုပြီးခွဲထားတာပါ။
Sloth ဟာသစ်ပင်နေနို့တိုက်သတ္တဝါ(mammals)အနွယ်ဝင်ဖြစ် Central America(မြောက်အမေရိကတိုက်ရဲ့ တောင်ဘက်စွန်းအပိုင်း) နဲ့ တောင်အမေရိကတိုက်တို့မှာ နေထိုင်ကြပါတယ်။ အရင်ကတော့ မြေပေါ်နေ Sloth ဖြစ်တဲ့ Megatherium ဆိုတာရှိခဲ့ဖူးပြီး အခုတော့ မျိုးတုံးပျောက်ကွယ်သွားပါပြီ။
သူတို့ဟာ အပူပိုင်း နဲ့ အပူလျှော့ပိုင်း ရာသီဥတုရှိရာ မိုးသစ်တောတွေမှာ အနေများတတ်ပါတယ်။ သူတို့ရဲ့ လှုပ်ရှားမှုဟာ ပုံမှန်ထက်အဆပေါင်းများစွာ နှေးကွေးပါတယ်။ ဒါဟာ ဆလော့အကောင်အရေအတွက်ကို တဖြည်းဖြည်းလျှော့နည်းသွားစေတဲ့ အဓိက အချက်ဖြစ်ပါတယ်။ ပုံမှန်ဆလော့တစ်ကောင်ဟာ ၂ပေကနေ ၂.၅ပေ အမြင့်ရှိပြီး ၈ပေါင်ကနေ ၁၇ပေါင်ခန့် အထိ အလေးချိန်ရှိပါတယ်။ကိုယ်ခန္ဓာ အမွှေးအရောင်ကလည်း အနက် ၊ အညို ၊ မီးခိုး စသည်ဖြင့် အမျိုးမျိုး ရှိနိုင်ပါတယ်။ မျက်လုံးနဲ့ နားရွက်ကြီးပြီး အမြီးတိုပါတယ်။
ဆလော့တွေဟာ သစ်ရွက်တွေ သစ်သီးတွေ စားတတ်ပါတယ်။ Three-toed ဆလော့တွေဟာ အလွန်ပျော့ပြောင်းပြီး သူတို့ရဲ့ဦးခေါင်းဘယ်ညာကို ၂၇၀ဒီဂရီအထိ လှည့်နိုင်စွမ်းရှိပါတယ်။ Sloth တွေဟာ ပုံမှန်အားဖြင့် တစ်နေ့ကို နာရီ ၂၀ ဝန်းကျင်ခန့်အိပ်စက်တတ်ပါတယ်။ အိပ်နေတဲ့အခါ သစ်ပင်ပေါ်မှာ ရေညှိပင်တွေပေါက်နေတဲ့ပုံနဲ့တူပါတယ်။ ကျန်တဲ့အချိန်တွေကတော့ အစားအသောက်ရှာဖွေစားသောက်တတ်ကြပါတယ်။
သူတို့ရဲ့ ဝမ်းဗိုက်ထဲမှာ အခန်းပေါင်း များစွာ ပါဝင်ပြီး အဲဒီထဲမှာရှိတဲ့ ဘက်တီးရီးယားတွေက မာကျောတဲ့ အရွက်တွေကို ချိုးဖျက်နိုင်စွမ်း ရှိပါတယ်။ ဒါပေမယ့် သူတို့ရဲ့ အစာချေဖျက်နိုင်စွမ်းဟာ နှေးကွေးပြီး အစာကြေဖို့ တစ်လ ဒါမှမဟုတ် တစ်လထက်ပိုပြီး အချိန်ယူရလေ့ရှိပါတယ်။ Sloth တွေဟာ များသောအားဖြင့် Cecropia သစ်ပင်တွေမှာ နေထိုင်လေ့ရှိကြပါတယ်။
ဆလော့တွေဟာ မြေပေါ်မှာသွားတဲ့အခါ ၁၀ပေ အကွာအဝေးကိုရောက်ဖို့ ၁မိနစ်သွားရပါတယ်။ ဒါပေမယ့် ရေကူးတဲ့အခါမှာတော့ ၁မိနစ်ကို ၄၅ပေ အကွာအဝေးထိရောက်အောင် ကူးနိုင်ပါတယ်။
အပင်ပေါ်ကနေ မြေပြင်ပေါ်ကို ဆင်းခဲတဲ့သတ္တဝါဖြစ်ပြီး အပေါ့အလေး သွားချင်မှသာ ဆင်းလေ့ရှိပါတယ်။ ဆင်းခဲတဲ့အကြောင်းကတော့ မြေပေါ်ရောက်တာနဲ့ သူတို့ဟာ တောကောင်ကြီးတွေရဲ့အစာ အချိန်မရွေးဖြစ်သွားနိုင်လို့ပါ။ သူတို့ကို အဓိက ရန်ရှာစားသောက်တဲ့အကောင်တွေကတော့ ကျားသစ် ၊ မြွေ ၊ Ocelot ဆိုတဲ့ တောကြောင်ကြီး တွေနဲ့ အသားစားငှက်တွေပဲဖြစ်ပါတယ်။
သူတို့ရဲ့လက်သည်းတွေဟာ ၃လက်မကနေ ၄လက်မဝန်းကျင်အထိ ရှည်လျားပါတယ်။ ဒါကြောင့်လည်း မြေပေါ်မှာသွားရင်နှေးပေးမယ့် သစ်ပင်ပေါ်မှာ သွားလာတဲ့အခါ မြန်ဆန်အောင် ဒီလက်သည်းတွေက ကူညီပေးပါတယ်။ လက်သည်းတွေကို တောကောင်ကြီးတွေရဲ့ အန္တရာယ်ကို ကာကွယ်တဲ့လက်နက်အဖြစ်လည်း သုံးတတ်ကြပါတယ်။ တိုက်ခိုက်တဲ့အခါ Sloth တွေဟာ ကိုက်တတ်သလို ၊ ကျယ်လောင်စွာအော်လေ့လည်း ရှိပါတယ်။
များသောအားဖြင့် Sloth တွေဟာ တစ်ကိုယ်တည်းနေထိုင်တတ်ကြပြီး မိတ်လိုက်ရာသီရောက်မှသာ အခြား Sloth တွေနဲ့ ဆုံလေ့ရှိကြပါတယ်။ မိတ်လိုက်ရာသီရောက်တဲ့အခါ Sloth အမတွေဟာ အသံပေးတတ်ပါတယ်။ ဒီအခါမျိုးမှာ မိတ်လိုက်လိုတဲ့ Sloth အထီးတွေဟာ အချင်းချင်းတိုက်ခိုက်ကြတတ်ပါတယ်။ အနိုင်ရသူဟာ မိတ်လိုက်ခွင့်ကို ရတာဖြစ်ပါတယ်။
ကိုယ်ဝန်ဆောင်ချိန်ဟာ ၇လ ကနေ ၁၀လ အထိကြာတတ်ပါတယ်။ မွေးကာစ ဆလော့တွေဟာ ၆လကနေ ၂နှစ်ခန့် အထိ မိခင်ရဲ့ထိမ်းသိန်းစောင့်ရှောက်မှုကို ခံကြရပါတယ်။ ပုံမှန်အားဖြင့် Sloth တွေရဲ့ သက်တမ်းဟာ ၁၀နှစ်မှ ၁၆နှစ်ဖြစ်ပြီး တခါတရံမှာတော့ ၃၀နှစ် ဝန်းကျင်အထိရှိတတ်ပါတယ်။
VIDEO
သုတဇုန်
