တစ်ခါက ဆင်တစ်ကောင်နဲ့ ခွေးတစ်ကောင်တို့ဟာ တစ်ချိန်တည်း ကိုယ်ဝန်ဆောင်ကြပါတယ် ။ သုံးလကြာတဲ့အခါ ခွေးမဟာ ခွေးလေး ၆ကောင်မွေးပါတယ်။ နောက် ၆လမြောက်မှာ ခွေးမက ကိုယ်ဝန်ထပ်ဆောင်ပြန်ပါတယ်။ ကိုးလရောက်တော့ ခွေး ၁ဒါဇင် ထပ်မွေးပြန်ပါတယ်။ အဲဒီအတိုင်းပဲ လည်ပတ်ရင်း ၁၈လ ကြာတဲ့အခါခွေးမဟာ ၃ကြိမ် ကိုယ်ဝန်ဆောင်ပြီး ၃ခါမွေးပြီးသွားပါပြီ။ ဆင်မကတော့ ကိုယ်ဝန်ဆောင်နေတုန်းပါပဲ။
ဒီတော့ ခွေးမက ဆင်မ ကိုမေးပါတယ်။
“ဟဲ့ ဆင်မ နင့်ဟာက ကိုယ်ဝန်ရော ဟုတ်ရဲ့လားဟယ် ၊ ငါဆိုရင် ကလေး ၃ခါမွေးပြီး တချို့တွေဆို ခွေးကြီးတွေတောင်ဖြစ်နေကြပြီ ၊ နင်က ခုထိကိုယ်ဝန်ဆောင်နေတုန်းပဲလား”
ဒီတော့ ဆင်မက ပြန်ဖြေပါတယ်။
” ဒီမှာ မခွေးမ ရှင်ပြောတာကို ကျွန်မနားလည်ပါတယ် ၊ ဒါပေမယ့် ကျွန်မလွယ်ထားတာ ဆင်ပါ ခွေးမဟုတ်ပါဘူး ၊ ကျွန်မဟာ တစ်ခါမွေးဖို့ ၂နှစ် ကိုယ်ဝန်ဆောင်ရပါတယ်၊ ကျွန်မကလေးမွေးလာတဲ့အခါ မြေကြီးက သိတယ် ၊ ဒီဆင်ကလေး လမ်းလျှောက်တဲ့အခါ လူတွေ တအံတသြနဲ့ ရပ်ကြည့်ကြလိမ့်မယ် ၊ ဒီလို ခွန်အားကြီးမားပြီး လူတွေစိတ်ဝင်စားရတဲ့ သန္ဓေသား ကိုယ်ဝန်ကို လွယ်ထားရတာကြောင့် အချိန်ဒီလောက်ကြာနေတာပါ”
————————————————–
အခြားသူတွေ အောင်မြင်သွားချိန်မှာ သင်မအောင်မြင်သေးလို့ သင့်ယုံကြည်မှုတွေ မပျောက်ဆုံးပါစေနဲ့ ၊ သူတို့ကိုလည်း မနာလိုမဖြစ်ပါနဲ့ ၊ ကြီးမားတဲ့အောင်မြင်မှုကို ရဖို့ မဆုတ်မနစ်ဇွဲ ၊ ယုံကြည်မှုနဲ့ အချိန်တွေအများကြီး ရင်းရပါတယ်။ သင်လွယ်ထားရတဲ့ အောင်မြင်မှုဟာ အခြားသူတွေထက် အများကြီးပိုနိုင်ပါတယ်။
အဲဒီတော့ အခြားသူတွေကိုမြင်ပြီး စိတ်ဓာတ်ကျ ၊ မနာလိုဖြစ်နေမယ့်အစား ကိုယ့်ရဲ့မနက်ဖြန်ကို ယုံကြည်မှုခွန်အား အပြည့်နဲ့ လျှောက်လှမ်းလိုက်ပါ မိတ်ဆွေ
