ဒီစေတီတော်တည်ရှိတဲ့ အရပ်ကတော့ စပိန်နိုင်ငံ ၊ မာလာဂါပြည်နယ် ၊ ဘန်နယ်မက်ဒီနားမြို့က တောင်ကုန်းလေးတစ်ခုအပေါ်မှာ ဖြစ်ပါတယ်။ ဉာဏ်တော် ၁၀၈ပေ အမြင့်ရှိတဲ့ ဒီစေတီဟာ ဥရောပမှာ အကြီးဆုံး နဲ့ အမြင့်ဆုံးစေတီလည်း ဖြစ်ပါတယ်။
ဘူတန် ဗုဒ္ဓဘာသာ ဘုန်းတော်ကြီး Lopon Tchechu Rinpoche ကို ၁၉၁၈ခုနှစ်က ဘူတန်ဘုရင့်နိုင်ငံမှာ မွေးဖွားခဲ့ပါတယ်။ ငယ်စဉ်ကတည်းက ဗုဒ္ဓဘာသာကို ယုံကြည်ကိုးကွယ်ခဲ့ပြီး သူအသက် ၁၃နှစ်အရွယ်မှာတော့ ပိုမိုလေ့လာသင်ကြားလိုတဲ့အတွက် ဘူတန်ကနေ သူ့ဦးလေးဘုန်းကြီးရှိတဲ့ နီပေါကို ထွက်ခွာခဲ့ပါတယ်။ နီပေါက ဘုန်းတော်ကြီးကျောင်းမှာ ဗုဒ္ဓစာပေများကိုသင်ကြားရင် တစ်ဖက်ကလည်း ဂူတွေကိုလှည့်လည်ပြီး တရားကျင့်ကြံခြင်းကို တစိုက်မတ်မတ်လုပ်ခဲ့ပါတယ်။
၁၉၈၇ ခုနှစ်ဝန်းကျင်မှာတော့ ဘုန်းတော်ကြီးဟာ ဥရောပနိုင်ငံများကိုလှည့်လည်ရင်း လူထောင်ပေါင်းများစွာကို ဝိပသနာတရားပြခဲ့ပါတယ်။ သူရဲ့ပထမဆုံး ဥရောပ တပည့်တွေကတော့ Ole Nydahl နဲ့ သူ့ရဲ့ဇနီးတို့ဖြစ်ပါတယ်။ ဘုန်းတော်ကြီးဟာ ဒီလိုလှည့်လည် တရားပြရင်း ဥရောပတလျှောက်မှာ စေတီပေါင်း ၁၆ ဆူ ကို တည်ထားခဲ့ပါတယ်။
ဘန်နယ်မက်ဒီနားမြို့မှာ တည်ခဲ့တဲ့ စေတီကတော့ ဘုန်းတော်ကြီး နောက်ဆုံးတည်ခဲ့တဲ့စေတီဖြစ်ပြီး ဒီစေတီတည်လို့မပြီးဆုံးခင် ၄လ အလို သက်တော် ၈၅နှစ်အရွယ်မှာ ဘုန်းတော်ကြီးဟာ ပျံလွန်တော်မူသွားခဲ့ပါတယ်။ ၂၀၀၃ခုနှစ်မှာတော့ စေတီတော် တည်ဆောက်ပြီးစီးခြင်း အခမ်းအနားကို ကျင်းပခဲ့ပြီး အဲဒီအခမ်းအနားကို ဘူတန်ဘုန်းတော်ကြီးတွေနဲ့အတူ ဧည့်ပရိသတ်ပေါင်း ၄ထောင်ခန့် တက်ရောက်ခဲ့ကြပါတယ်။
တိဘက်မှာ စေတီတည်ဆောက်ပုံ ၈မျိုးရှိပြီး အသီးသီးဟာ ဗုဒ္ဓရဲ့အရေးအကြီးဆုံး ဖြစ်တော်စဉ်တွေကို ကိုယ်စားပြုပါတယ်။ ဒီစေတီကတော့ တရားထူးရခြင်း (သို့) ဉာဏ်ပညာအလင်းပွင့်ခြင်း ကိုရည်ညွန်းကိုယ်စားပြုတဲ့ ပုံသဏ္ဍာန်နဲ့ တည်ထားတာဖြစ်ပါတယ်။
စေတီကို အဆောက်အအုံပေါ်က ထပ်ဆင့်တည်ဆောက်ထားတာဖြစ်ပြီး ဒီဇိုင်းကတော့ ပိုလန်ဗိသုကာပညာရှင် Wojtek Kossowski ရဲ့ လက်ရာဖြစ်ပါတယ်။ စေတီအောက်ဘက်မှာတော့ ပေ ၁၀၀ ပတ်လည်ကျယ်ဝန်းတဲ့ ဝိပသနာတရားထိုင်ရာခန်းမ ရှိပြီး နံရံမှာတော့ ဗုဒ္ဓရဲ့ဘဝဖြစ်တော်စဉ် ပန်းချီများကို တွေ့ရမှာဖြစ်ပါတယ်။
ဒီစေတီ အဆောက်အအုံကို စနေ နဲ့ တနင်္လာနေ့ ကလွဲရင် ကျန်ရက်တွေမှာ လေ့လာလည်ပတ်ဖို့ ဖွင့်လှစ်ထားပြီး အဲဒီနေ့တွေမှာ ဝိပသနာ အတန်းတွေလည်းရှိနေမှာ ဖြစ်ပါတယ်။ လက်ရှိအချိန်မှာတော့ ဘန်နယ်မက်ဒီနားမြို့က ဒီဗုဒ္ဓဘာသာစေတီတော်ဟာ အနောက်ကမ္ဘာမှာ အကြီးဆုံးစေတီဖြစ်သလို ဥရောပက ဗုဒ္ဓဘာသာဝင်အများဆုံး ဝိပသနာတရား လာရောက်အားထုတ်လေ့ရှိရာ နေရာတစ်ခုလည်း ဖြစ်လို့နေပါပြီ။
VIDEO
