ဆန်တိုရီနီ ဆိုတာ ဂရိကုန်းမကြီးရဲ့ အရှေ့တောင်ဘက် ၁၂၀မိုင်အကွာက အေဂျင်ပင်လယ်ထဲမှာရှိတဲ့ ကျွန်းလေးတစ်ကျွန်းဖြစ်ပါတယ်။ အကျယ်အားဖြင့် ၂၈ စတုရန်းမိုင်ကျယ်ပြီး လူဦးရေ ၁၅၀၀၀ကျော်ခန့်သာ နေထိုင်တဲ့ ကျွန်းဖြစ်ပါတယ်။ လှပတဲ့ရှုခင်းတွေနဲ့ ချစ်စဖွယ်အဆောက်အအုံလေးတွေကြောင့် ဂရိနိုင်ငံရဲ့ လူသိအများဆုံးကျွန်းလည်းဖြစ်ပါတယ်။ မူလနာမည်က သီရာ ဖြစ်ပေမယ့် တစ်ကမ္ဘာလုံးကတော့ ဆန်တိုရီနီလို့ပဲ သိကြပါတယ်။
ဆန်တိုရီနီကျွန်းပေါ်မှာရှိတဲ့ Akrotiri မြို့ဟောင်းကြီးဟာ အတ္တလန္တိတ်မြို့တော်နဲ့ ဆက်စပ်နေတယ်လို့ ပညာရှင်များက ယူဆကြပါတယ်။ ဆန်တိုရီနီ ကျွန်းနဲ့ အခြားကျွန်းနှစ်ကျွန်းတို့အလယ်မှာ မီးတောင်ကြီးတစ်တောင် ရှိပါတယ်။ ကျွန်းအလယ်ပိုင်း နဲ့ အတူမီးတောင်ကြီးဟာာ ဘီစီ ၁၆၁၃ မှာ ဖြစ်ခဲ့တဲ့ မီးတောင်ပေါက်ကွဲမှုကြီးနဲ့အတူ နစ်မြုပ်သွားခဲ့ပြီး ဘီစီ ၄၆ ကမှစလို့ ချော်ရည်ပြည့်နေတဲ့မီးတောင်ကြီးဟာ ပင်လယ်ထဲကနေ တဖြည်းဖြည်းပေါ်ထွက်လာတာခဲ့တာဖြစ်ပါတယ်။ ဒီမီးတောင်ကြီးဟာ ၁၉၅၀ခုနှစ်မှာ နောက်ဆုံးပေါက်ကွဲခဲ့တဲ့ မီးတောင်ရှင်ဖြစ်ပါတယ်။
နောက်ထပ်ဒီကျွန်းမှာပေါပေါများများတွေ့ရမှာက မြည်းတွေပါ။ မြည်းအကောင်ပေါင်း သောင်းနဲ့ချီပြီးရှိပါတယ်။ အိမ်တွေရဲ့အမိုးကိုတော့ ဂရိအလံအရောင်ဖြစ်တဲ့ အပြာ နဲ့ အဖြူသာ သုတ်ထားကြပါတယ်။ မီးတောင်ဝန်းကျင်ဖြစ်တဲ့အတွက် စိုက်ပျိုးရေးအလွန်ဖြစ်ထွန်းပြီး စပျစ်ဝိုင်ကတော့ နာမည်ကြီးပါ။ ဒီကျွန်းပေါ်မှာ စပျစ်အမျိုးပေါင်း ၁၀၀ ကျော်ရှိပါတယ်။ ဒီကျွန်းစည်ကားလာတာ ၁၉၆၀ နောက်ပိုင်းမှ ဖြစ်ပြီး ဒီမတိုင်ခင်မှာတော့ ငါးဖမ်းသမားတချို့သာနေထိုင်ခဲ့ကြပါတယ်။
မိုးအလွန်နည်းပါးတဲ့နေရာဖြစ်ပြီး ဒီကျွန်းပေါ်မှာ ရေထက် ဝိုင်တွေက ပိုပေါများပါတယ်။ လူနေအိမ်တွေထက် ခရစ်ယာန်ဘုရားကျောင်းတွေကပိုများပါတယ်။ ဒါပေမယ့် ဘုရားကျောင်းအများစုဟာ အရွယ်အစားသေးငယ်ပါတယ်။ ကျွန်းပေါ်မှာ လူအမြဲနေထိုင်သူ ၂သောင်းမပြည့်ပေမယ့် လာရောက်လည်ပတ်တဲ့သူကတော့ ၁နှစ်ကို ၁သန်းခွဲခန့်ရှိပါတယ်။ စားသောက်ဆိုင်တွေ ဟိုတယ်တွေကိုလည်း နေရာအနှံ့မှာတွေ့နိုင်ပါတယ်။ ကြည့်လဲ့လဲ့ ရေပြာပြာနဲ့အတူ မီးတောင်ရှုခင်းတွေ၊ ကျွန်းပေါ်ကမြင်ရတဲ့ ရင်သပ်ရှု့မောဖွယ် နေဝင်ချိန်ရှုခင်းတွေကြောင့် ဆန်တိုရီနီဟာ အလှဆုံးကျွန်းတစ်ကျွန်းအဖြစ် နာမည်ကြီးရခြင်းဖြစ်ပါတယ်။
VIDEO
