ဂရင်းနစ် နဲ့ ဂင်းနစ် ဘာကွာသလဲ

Posted on

အွန်လိုင်းပေါ်မှာတော့ ဂရင်းနစ် နဲ့ ဂင်းနစ် ဆိုတဲ့ စာလုံးတွေကို မကြာခဏမြင်ဖူးကြမှာပါ။ ဂရင်းနစ်စံချိန် ၊ ဂင်းနစ် မှတ်တမ်း ၊ ဂင်းနစ်စံတော်ချိန် စသည်ဖြင့် ရောပြီးရေးကြတဲ့အခါ တချို့မိတ်ဆွေတွေက ဒီစကားလုံးနှစ်လုံးကို တူသလိုလို ရောထွေးနေကောင်း ရောထွေးနေနိုင်ပါတယ်။ ဒီတခါတော့ ဂရင်းနစ် နဲ့ ဂင်းနစ် ရဲ့ အကြောင်းကို ဗဟုသုတ အနေနဲ့ ဝေမျှလိုက်ပါတယ်။

ဂရင်းနစ် Greenwich

ဂရင်းနစ် Greenwich ဆိုတာကတော့ အင်္ဂလန်နိုင်ငံ လန်ဒန်မြို့ အရှေ့တောင်ပိုင်းက နယ်မြေတခုဖြစ်ပါတယ်။ ကမ္ဘာရဲ့တည်နေရာဒေသတွေကို လွယ်ကူစွာ သတ်မှတ်နိုင်စေဖို့ မြောက်ဝင်ရိုးစွန်းကနေ တောင်ဝင်ရိုးစွန်းသို့ ဒေါင်လိုက်မျဉ်းများ မှန်းဆခွဲဝေရာမှာ ဒီဂရင်းနစ်ဒေသ နဲ့ အတည့်ဖြတ်မျဉ်းကို သုံညဒီဂရီ အဖြစ် အမှတ်ထားပါတယ်။ ဒီနေရာကို ဗဟိုအဖြစ် အမှတ်ထားပြီး အရှေ့အနောက် အသီးသီးသို့ တိုး၍ ရေတွက်ရခြင်းဖြစ်ပါတယ်။

တနိုင်ငံနဲ့ တနိုင်ငံ အချိန်ချင်း မတူညီတဲ့အတွက် ဂရင်းနစ်စံတော်ချိန်ကို ကမ္ဘာ့စံတော်ချိန်အဖြစ်သတ်မှတ်ပြီး သက်ဆိုင်ရာနိုင်ငံရဲ့ အချိန်ကို တိုးခြင်း လျော့ခြင်းများပြု၍ မှတ်သားကြတာဖြစ်ပါတယ်။

ကျွန်တော်တို့ မြန်မာနိုင်ငံရဲ့ အချိန်ကို ပြတဲ့အခါ GMT +6:30 လို့မြင်ကြရမှာဖြစ်ပြီး စင်ကာပူရဲ့အချိန်ကို ပြတဲ့အခါ GMT+08:00 ဆိုပြီးတွေ့ကြရမှာဖြစ်ပါတယ်။ အဲဒီမှာ GMT ဆိုတာက ဂရင်းနစ်စံတော်ချိန် Greenwich Mean Time ရဲ့ အတိုကောက်ဖြစ်ပါတယ်။

မြန်မာနိုင်ငံက GMT +6:30 လို့ ဆိုတဲ့အတွက် ဂရင်းနစ်စံတော်ချိန်ထက် ၆နာရီခွဲပိုစောတယ် ဆိုတဲ့ အဓိပ္ပါယ်ပါ။ စင်ကာပူက GMT+08:00 ဖြစ်တဲ့အတွက် ဂရင်းနစ်စံတော်ချိန်ထက် ၈ နာရီပိုစောတယ် ဆိုတဲ့ အဓိပ္ပါယ်ရပါတယ်။

ဆိုတော့ အခု မြန်မာမှာ ည ၇နာရီခွဲရှိနေချိန်မှာ စင်ကာပူမှာတော့ ည ၉ နာရီဖြစ်နေမှာ ဖြစ်ပါတယ်။ အနှုတ် (-) နဲ့ ပြမယ်ဆိုရင်တော့ ဂရင်းနစ်စံတော်ချိန်ထက် နောက်ကျတယ်ဆိုတဲ့ အဓိပ္ပါယ်ပါ။ အောက်ကပုံကို ကြည့်ရင်ရှင်းသွားပါလိမ့်မယ်။

ဂင်းနစ် Guinness

ဂင်းနစ် Guinness ဆိုတာကတော့ ကမ္ဘာပေါ်မှာ နာမည်ကြီးတဲ့ အဖျော်ယမကာ အမှတ်တံဆိပ်တခုဖြစ်ပြီး နိုင်ငံပေါင်း ၁၂၀ မှာ ရရှိနိုင်ပါတယ်။ ၁၉၅၁ ခုနှစ်တုန်းက အဲဒီ ဂင်းနစ်ဘီယာချက်စက်ရုံရဲ့ မန်နေးဂျင်းဒါရိုက်တာ Sir Hugh Beaver နဲ့ မိတ်ဆွေတွေကြားမှာ အငြင်းအခုံတခုဖြစ်ခဲ့ပါတယ်။

အဲဒါကတော့ ဥရောပတိုက်မှာ အမဲလိုက်တဲ့အခါ အမြန်ဆုံးငှက်ဟာ ရွှေရောင်ဒီလုံးငှက်လား ၊ အနီရောင်ခါ(red grouse) လား ဆိုပြီးတော့ ဖြစ်ပါတယ်။ Sir Hugh ဟာ ဒီအဖြေကိုရဖို့ စာအုပ်ပေါင်းများစွာမှာ လိုက်လံရှာဖွေခဲ့ပေမယ့် တိကျတဲ့အဖြေမရခဲ့ပါဘူး။ (အမှန်က ရွှေရောင်ဒီလုံးငှက် ဖြစ်ပါတယ်)

ဒီမှာတင် သူအကြံတခုရပါတယ်။ အဲဒါကတော့ အငြင်းအခုန်ပွဲတွေဟာ မကြာခဏဖြစ်ပွားလေ့ရှိပေမယ့် တိကျတဲ့အဖြေမရှိတာကြောင့် ဒါတွေအားလုံးပါဝင်တဲ့ စာအုပ်ထုတ်ရောင်းချနိုင်ရင် အောင်မြင်မှာပဲ ဆိုပြီးဖြစ်ပါတယ်။ ဒီနောက်မှာတော့ အချက်အလက်ရှာဖွေရာမှာ အလွန်တော်တဲ့ Norris နဲ့ Ross McWhirter အမွှာညီအစ်ကိုနဲ့ ချိတ်မိကာ စာရင်းပြုစုစာအုပ်ထုတ်ဝေဖို့ လုပ်ငန်းအပ်နှံခဲ့ပါတယ်။

McWhirter ညီအစ်ကိုဟာ ၁နှစ်ခန့်ကြာအောင် အမြန်ဆုံး ၊ အနှေးဆုံး ၊ အကြီးဆုံး ၊ အသေးဆုံး ၊ အလေးဆုံး စသည့်အချက်အလက်များကို ရှာဖွေ စာရင်းပြုစုပြီးတဲ့နောက်မှာတော့ ပထမဆုံးဂင်းနစ်ကမ္ဘာ့စံချိန်မှတ်တမ်းစာအုပ် Guinness World Records ကို ၁၉၅၅ ခုနှစ်မှာ စတင်ထုတ်ဝေနိုင်ခဲ့ပါတယ်။

ထုတ်ဝေပြီးပြီးချင်းမှာပဲ အလွန်လူကြိုက်များအောင်မြင်ခဲ့ပြီး နောက် ၁နှစ် အမေရိကန်မှာ ထုတ်ေ၀ တင်ပို့တဲ့အခါမှာတော့ စာအုပ်ပေါင်း ၇၀၀၀၀ ခန့်အထိ ရောင်းချနိုင်ခဲ့ပါတယ်။ စိတ်ဝင်စားဖွယ် အချက်အလက်တွေနဲ့ အကြောင်းအရာတိုကလေးတွေ စုစည်းထားတဲ့ ဂင်းနစ်မှတ်တမ်းစာအုပ်တွေဟာ ယနေ့အချိန်မှာတော့ နှစ်စဉ် စောင်ရေ ၃.၅သန်းခန့် ရောင်းချရတဲ့အထိ အောင်မြင်နေပြီဖြစ်ပါတယ်။

ကမ္ဘာ့အရောင်းရဆုံး ကော်ပီရိုက်စာအုပ်အဖြစ် နိုင်ငံပေါင်း ၁၀၀ မှာ ဘာသာစကား ၂၃မျိုးနဲ့ထုတ်ဝေကာ စောင်ရေစုစုပေါင်း သန်း ၁၀၀ ကျော်အထိ ရောင်းချနိုင်ခဲ့ပြီးဖြစ်ပါတယ်။

အမြင့်ဆုံး ၊ အမြန်ဆုံး ၊ အများဆုံး အစရှိတဲ့ စံချိန်တွေကိုသတ်မှတ်တဲ့အခါမှာ တိရစ္ဆာန်တွေ ၊ အဆောက်အအုံတွေ သာမက လူသားတွေဟာလည်း စံချိန်အသီးသီးတင်ကာ ဂင်းနစ်ကမ္ဘာ့မှတ်တမ်းမှာ ပါဝင်နိုင်ခဲ့ကြပါတယ်။ ဂင်းနစ်မှတ်တမ်းမှာ ပါဝင်လို့ ဘာငွေကြေး ၊ ဘာဆုမှ မရပေမယ့် ကမ္ဘာ့စံချိန်ရှင်ပုဂ္ဂိုလ်အဖြစ် ဂင်းနစ်ရဲ့ တရားဝင် အသိအမှတ်ပြုလက်မှတ်ကို ရရှိတာကြောင့် လူသိများသွားမှာတော့ အမှန်ပဲဖြစ်ပါတယ်။

အဲဒီတော့ ပြန်ချုပ်လိုက်မယ်ဆိုရင် ဂရင်းနစ် ဆိုတာ ဂရင်းနစ်ကမ္ဘာ့စံတော်ချိန် (GMT) ကိုပြောတာ ဖြစ်ပြီး ဂင်းနစ် (Guinness ) ကတော့ ကမ္ဘာ့စံချိန်မှတ်တမ်းကိုပြောတာဖြစ်ပါကြောင်း ဂရင်းနစ် နဲ့ ဂင်းနစ် ရောနေတဲ့ မိတ်ဆွေတွေအတွက် ဗဟုသုတအဖြစ် ဝေမျှလိုက်ရပါတယ်။