သူကတော့ ဂျပန်ရဲအရာရှိဖြစ်သူ Yukio Shige ပဲ ဖြစ်ပါတယ်။ ယခုအချိန်မှာ သူ့အသက်ဟာ ၇၀ ရှိပါပြီ။ သူ့သက်တမ်းတစ်လျှောက်မှာ ကိုယ့်ကိုယ်ကို သတ်သေမယ့် လူပေါင်းများစွာရဲ့အသက်ကို ကယ်တင်နိုင်ခဲ့ပါတယ်။ သူကယ်တင်ခဲ့တဲ့ ကိုယ့်ကိုယ်ကို သတ်သေတဲ့သူအရေအတွက်ကတော့ ၅၀၀ကျော်ဖြစ်ပါတယ်။ ကမ္ဘာပေါ်က ကိုယ့်ကိုယ်ကိုသတ်သေမှုအများဆုံးနိုင်ငံတစ်နိုင်ငံဖြစ်တဲ့ ဂျပန်မှာ ဒီလိုသူရဲကောင်းတစ်ယောက်ရှိနေပါသေးတယ်။
တကယ်တော့ Yukio ဟာ ဖူကူအိနယ်မြေက ရဲအရာရှိဟောင်းတစ်ယောက်ဖြစ်ပြီး ဝန်ထမ်းဘဝကို ၄၂နှစ်ကြာ ထမ်းဆောင်ခဲ့သူဖြစ်ပါတယ်။ သူပင်စင်မယူခင်နောက်ဆုံး တာဝန်ကျခဲ့တဲ့နေရာကတော့ ဒီ Tonjinbo ဒေသမှာဖြစ်ပါတယ်။ မကြာခဏ ကိုယ့်ကိုယ်ကိုသတ်သေသူတွေရဲ့ အလောင်းတွေကို ဆယ်ယူခဲ့ရပါတယ်။
ဒီလိုအချိန်မျိုးမှာ Yukio ဟာ အလွန်စိတ်ထိခိုက်လေ့ရှိပါတယ်။ ဒါကြောင့် ဒီလူတွေအတွက် သူ့မှာတာဝန်ရှိတယ်လို့ ခံယူထားပြီး ပင်စင်ယူချိန်ကစလို့ အသက် ၇၀ပြည့်တဲ့အထိ တောက်လျှောက်ကယ်ဆယ်ခဲ့တာပဲဖြစ်ပါတယ်။
မစ္စတာ Yukio ဟာ ဖူကူအိ (Fukui) စီရင်စုမှာရှိတဲ့ တိုးဂျင်ဘို(Tonjinbo) တောင်ကုန်းတွေတလျှောက်ကို လှည့်လည်စောင့်ကြည့်လေ့ရှိပါတယ်။ ဒီနေရာဟာ ခရီးသွားတွေ လာလေ့ရှိတဲ့အပြင် သတ်သေမှုအများဆုံးဖြစ်ပွားရာ နေရာတစ်ခုအဖြစ်လည်း နာမည်ကြီးပါတယ်။ Yukio ဟာ ဒီနေရာတစ်ဝိုက်ကို နေ့စဉ်နေ့တိုင်း စေတနာ့ဝန်ထမ်း ၃ဦး နဲ့အတူ လှည့်ပတ်နေလေ့ရှိပါတယ်။
ဒီလိုကြည့်ရှု့တဲ့အခါမှာ အဝေးကနေ လှမ်းကြည့်နိုင်ဖို့အတွက် အဝေးကြည့်မှန်ပြောင်းတွေကို သုံးကာ ကြည့်ရှု့လေ့ရှိပါတယ်။ သူတို့ဟာ သတ်သေဖို့ကြိုးစားနေသူတွေကိုတွေ့တဲ့အခါ ဖြောင်းဖြပြောဆိုပြီး ဘဝကိုအရှုံးမပေးဖို့ သတ်မသေစေဖို့ အတတ်နိုင်ဆုံးကြိုးစားကြလေ့ရှိပါတယ်။
သူတစ်ယောက်တည်း လပေါင်း နှစ်ပေါင်းများစွာ ကင်းလှည့်ကူညီနေပြီးတဲ့နောက်မှာ ဒေသခံလူငယ်တွေကလည်း ဝိုင်းကူညီတာကြောင့် NPO ဆိုတဲ့အဖွဲ့လေးဖြစ်လာခဲ့ပါတယ်။ Yukio ဦးဆောင်တဲ့ဒီအဖွဲ့လေးဟာ ၁၁နှစ်အတွင်းမှာ ကိုယ့်ကိုယ်ကို သတ်သေမယ့် လူပေါင်း ၅၀၀ကျော်ရဲ့ အသက်ကို ကယ်တင်ခဲ့နိုင်ပါတယ်။
၂၀၀၃ခုနှစ်ကတည်းက ကယ်ဆယ်မှုတွေကို လုပ်ဆောင်ခဲ့တဲ့ Yukio ဟာ အခုအချိန်မှာတော့ ဒီပရဟိတအလုပ်ကို ဆက်လက်လုပ်ချင်နေပေမယ့် သူ့အသက်အရွယ်ကြောင့်နားလိုက်ရပါပြီ။ သူအနားမယူခင် နောက်ဆုံးကယ်ခဲ့တဲ့သူတွေကတော့ အကြွေးတွေနစ်နေတဲ့ စားသောက်ဆိုင်ပိုင်ရှင် စုံတွဲနှစ်ယောက်ဖြစ်ပါတယ်။ သူတို့ဟာ ပင်လယ်ထဲကိုခုန်ချပြီး ကိုယ့်ကိုယ်ကိုသတ်သေကြဖို့ ပြင်ဆင်ထားခဲ့ကြပါတယ်။
Yukio တွေ့သွားတဲ့အခါမှာတော့ သူကိုယ်တိုင်တတ်နိုင်သလောက် ကူညီပေးမယ်လို့ပြောပြီး သူတို့အသက်ကို ကယ်တင်ခဲ့နိုင်ပါတယ်။ ဝမ်းနည်းဖို့ကောင်းတာကတော့ အဲဒီအချိန်တုန်းက ဒီစုံတွဲဟာ သတ်မသေခဲ့ကြပေမယ့် နောက် ၅ရက်အကြာမှာတော့ ဆွဲကြိုးချပြီး သတ်သေသွားကြပါတယ်။ Yukio အလွန်ပဲစိတ်ထိခိုက်ခဲ့ရပါတယ်။
တိုက်အမြင့်တွေ ၊ တောင်ကုန်းပေါ်တွေကနေ ခုန်ချဖို့ကြိုးစားသူတွေ ၊ ဒါမှမဟုတ် တနည်းနည်းနဲ့ သတ်သေဖို့ကြိုးစားသူတွေကို မစ္စတာ Yukio ဟာ သူတတ်နိုင်သလောက် အစွမ်းကုန်တားပြီး ကယ်ဆယ်လေ့ရှိပါတယ်။ Yukio ဟာ သတ်သေဖို့ ကြိုးစားသူတွေရဲ့ ဘဝကို တတ်နိုင်သလောက် ကူညီပြီး သူတို့ရဲ့ဘဝတွေကို ပြန်လည်ရှင်သန်စေခဲ့တဲ့ ရှာမှရှားတဲ့ သူရဲကောင်းတစ်ယောက်ပဲ ဖြစ်ပါတယ်။
