ကမ္ဘာပေါ်က လူ့သက်တမ်းအရှည်ဆုံး နိုင်ငံ ၁၀ နိုင်ငံ

Posted on

အားလုံးပဲ မင်္ဂလာပါရှင်။

လူသားတစ်ယောက်အတွက် အကြီးမားဆုံးသော ဆုလာဒ်ကတော့ ကျန်းမာပြီး အသက်ရှည်စွာ နေထိုင်နိုင်ဖို့ ဖြစ်ပါတယ်။ ဒီလိုကျန်းမာအသက်ရှည်စွာ နေထိုင်နိုင်ဖို့ ဆိုတာကလည်း မိမိကိုယ်တိုင်အပြင် နေထိုင်တဲ့ နိုင်ငံတွေအပေါ်မှာလည်း မူတည်နေပါတယ်။

အေးချမ်းသာယာပြီး စီးပွားရေးဖွံ့ဖြိုးတိုးတက်တဲ့ နိုင်ငံတွေမှာ နေထိုင်သူအများစုဟာ အသက်ရှည်ကြပြီး ဆင်းရဲနိမ့်ကြခြင်းအပြင် ၊ ရောဂါဘယထူပြောခြင်း ၊ မတည်ငြိမ်တဲ့နိုင်ငံရေး စတာတွေကို ပိုင်ဆိုင်ထားတဲ့ နိုင်ငံတွေမှာတော့ နိုင်ငံသားအများစုဟာ အသက်ရှည်ရှည် နေခွင့်မရကြပါဘူး။

ယနေ့ ကမ္ဘာကြီးပေါ်မှာ နေထိုင်တဲ့ လူသားတွေရဲ့ ပျမ်းမျှသက်တမ်းဟာ အနှစ် ၇၀ ဝန်းကျင်လို့ ဆိုပေမယ့် အေးချမ်းသာယာတဲ့ နိုင်ငံအများစုက နိုင်ငံသားတွေရဲ့ ပျမ်းမျှသက်တမ်းကတော့ အသက် ၈၀ ကျော်အထိ ရှိနေပါတယ်။ အာဖရိက နိုင်ငံအချို့မှာတော့ နိုင်ငံသားတွေဟာ အရွယ်မတိုင်မီ ကွယ်လွန်သွားကြပြီး သူတို့ရဲ့ပျမ်းမျှသက်တမ်းကလည်း နှစ်ပေါင်း ၅၀ နဲ့ ၆၀ ကြားမှာသာ ရှိနေပါတယ်။

ဒီတခါတော့ ယနေ့ကမ္ဘာပေါ်မှာ ဘယ်နိုင်ငံတွေရဲ့ ပျမ်းမျှလူသက်တမ်းဟာ အရှည်ဆုံးဖြစ်သလဲ ဆိုတာကို သုတဇုန် မိတ်ဆွေအတွက် ဝေမျှလိုက်ပါတယ်။

နံပါတ် ၁၀။ နော်ဝေ

နော်ဝေနိုင်ငံကတော့ ဥရောပတိုက် စကင်ဒီနေးဗီးယန်းကျွန်းဆွယ်ဒေသမှာ တည်ရှိတဲ့ နိုင်ငံတနိုင်ငံဖြစ်ပါတယ်။ တိုင်းပြည်ရဲ့ သဘာဝကို က အေးချမ်းတဲ့ ရာသီဥတုရှိနေသလို တည်ငြိမ်တဲ့နိုင်ငံရေး ၊ ကောင်းမွန်တဲ့ အစိုးရတွေကိုလည်း ပိုင်ဆိုင်ထားတဲ့ နိုင်ငံဖြစ်ပါတယ်။ ကျန်းမာရေးစောင့်ရှောက်မှု အနေနဲ့ကလည်း ကမ္ဘာ့ထိပ်တန်းနိုင်ငံတွေအနက်က ၁ ခု ဖြစ်ပါတယ်။ ဒီစာရင်းရဲ့ အဆင့် ၁၀ မှာ ရှိနေတဲ့ နော်ဝေနိုင်ငံသူ နိုင်ငံသားတွေရဲ့ ပျမ်းမျှလူ့သက်တမ်းကတော့ ၈၂.၆ နှစ် ဖြစ်ပါတယ်။

နံပါတ် ၉။ အစ္စရေး

လူ့သက်တမ်းအရှည်ဆုံး နိုင်ငံတွေအနက် အဆင့် ၉ မှာ ရှိနေတာကတော့ ဂျူးလူမျိုးတွေနေတဲ့နိုင်ငံလို့ သိကြတဲ့ အစ္စရေးနိုင်ငံ ဖြစ်ပါတယ်။ အစ္စရေးတွေရဲ့ အဓိက ကျန်းမာခြင်းအချက်ကတော့ အစားအသောက်လို့ ဆိုရမှာပါ။ လတ်ဆတ်တဲ့ ဟင်းသီးဟင်းရွက် ၊ အသား ငါးတွေကိုသာ စားကြပြီး အစ္စရေးရဲ့ နာမည်ကျော် ဟင်းသီးဟင်းရွက်သုတ် Israeli Salad ဆိုရင်လည်း နိုင်ငံသား အားလုံးနီးပါး နှစ်သက်စွာ စားသုံးကြပါတယ်။ လူဦးရေ ၉သန်းဝန်းကျင်ရှိတဲ့ အစ္စရေးနိုင်ငံသားတွေဟာ နှစ်စဉ် ဟင်းသီးဟင်းရွက် နဲ့ သစ်သီး ၁၅၀ ကီလိုဂရမ်ထက်မနည်း စားသုံးလေ့ရှိတယ်လို့ သိရပါတယ်။ အစိုးရရဲ့ နိုင်ငံသားတွေအပေါ် ကျန်းမာရေးစောင့်ရှောက်မှုစနစ်ကလည်း အထူးကောင်းမွန်ပြီး ဒီနိုင်ငံသားတွေရဲ့ ပျမ်းမျှလူ့သက်တမ်းကတော့ ၈၂.၆ နှစ် ဖြစ်ပါတယ်။

နံပါတ် ၈။ အီတလီ

တချိန်က ရောမနိုင်ငံအဖြစ် သမိုင်းတလျှောက် အစဉ်အလာကြီးမားခဲ့တဲ့ အီတလီနိုင်ငံဟာလည်း နှစ်စဉ်နှစ်တိုင်း ထုတ်ပြန်နေတဲ့ အသက်အရှည်ဆုံးစာရင်းမှာ အမြဲပါဝင်နေလေ့ရှိပါတယ်။ ၁၉၇၈ ခုနှစ်ကတည်းက ကမ္ဘာ့အဆင့်မီ ကျန်းမာရေးစနစ်ကိုပိုင်ဆိုင်ခဲ့တဲ့ အီတလီဟာ ကျန်းမာရေးစောင့်ရှောက်မှု ကဏ္ဍမှာ နိုင်ငံဝင်ငွေစုစုပေါင်းရဲ့ ၉% ကျော် ကို သုံးစွဲထားပါတယ်။ သန့်ရှင်းတဲ့ရေ နဲ့ ကျန်းမာရေးနဲ့ ညီညွတ်တဲ့ ဟင်းသီးဟင်းရွက်တွေ ပေါများစွာ ရရှိစားသုံးနိုင်တာကလည်း အီတလီလူမျိုးတွေကို အသက်ရှည်ကျန်းမာနေစေပါတယ်။ အီတာလျံတွေရဲ့ ပျမ်းမျှလူ့သက်တမ်းကတော့ ၈၃ နှစ် ဖြစ်ပါတယ်။

နံပါတ် ၇။ သြစတြေးလျ

ကမ္ဘာ့အကောင်းမွန်ဆုံး ကျန်းမာရေးစောင့်ရှောက်မှုတွေရှိတဲ့ သြစတြေးလျနိုင်ငံကတော့ ကမ္ဘာပေါ်က လူ့သက်တမ်းအရှည်ဆုံး နိုင်ငံတွေစာရင်းမှာ နံပါတ် ၇ နေရာမှာ ရှိနေပါတယ်။ လွန်ခဲ့တဲ့ ဆယ်စုနှစ် လေးငါး ခုက သြစတြေးလျနိုင်ငံသားတွေရဲ့ ပျမ်းမျှသက်တမ်းဟာ နှစ် ၇၀ ဝန်းကျင်ပဲ ရှိခဲ့ရာကနေ တနှစ်ထက်တနှစ် ပိုမိုတိုးတက်လာခဲ့ပြီး ဒီဘက် ဆယ်စုနှစ်တွေမှာတော့ ပျမ်းမျှသက်တမ်းဟာ အနှစ် ၈၀ ကျော်သွားပြီဖြစ်ပါတယ်။ ကျန်းမာရေး နဲ့ ညီညွတ်တဲ့ အစားအစာတွေကို စားတာအပြင် သြစတြေးလျအစိုးရဟာလည်း ကျန်းမာရေးစောင့်ရှောက်မှုကဏ္ဍအတွက် နိုင်ငံဝင်ငွေ စုစုပေါင်းရဲ့ ၁၀% နီးပါးကို သုံးစွဲပေးထားတာကလည်း သြစတြေးလျနိုင်ငံသားတွေ ကျန်းမာစေတဲ့ အချက်တချက်ဖြစ်ပါတယ်။ သြစတြေးလျ နိုင်ငံသားတွေရဲ့ ပျမ်းမျှလူ့သက်တမ်းကလည်း ၈၃ နှစ် ဖြစ်ပါတယ်။

နံပါတ် ၆ ။ ဆိုက်ပရပ်စ်

ကမ္ဘာ့ကျန်းမာရေးအဖွဲ့က ၂၀၂၀ ခုနှစ်မှာ ထုတ်ပြန်တဲ့ ဒီစာရင်းမှာ ထူးထူးခြားခြားပါဝင်လာတာကတော့ မြေထဲပင်လယ်ဒေသက ကျွန်းနိုင်ငံလေး ဆိုက်ပရပ်စ် ဖြစ်ပါတယ်။ ဒီဘက်နှစ်တွေဟာ ဆိုက်ပရပ်စ်ရဲ့ စီးပွားရေးဟာ အထူးကောင်းမွန်လာပြီး အစိုးရ အနေနဲ့လည်း ပိုမိုကောင်းမွန်တဲ့ ကျန်းမာရေးစနစ်ကို ပေးနိုင်ခဲ့ပါပြီ။ ၂၀၁၄ ခုနှစ်ကတည်းက နိုင်ငံဝင်ငွေစုစုပေါင်းရဲ့ ၇% ကို ကျန်းမာရေးကဏ္ဍအတွက် အသုံးပြုခဲ့တဲ့ နိုင်ငံလည်းဖြစ်ပါတယ်။ ဆိုက်ပရပ်စ်သားတွေ ကျန်းမာစေတဲ့ နောက်တချက်ကတော့ ဟင်းသီးဟင်းရွက် ၊ အသားငါး ၊ သံလွင်ဆီ နဲ့ သန့်ရှင်းတဲ့ရေကို အလွယ်တကူ ရယူစားသောက်လေ့ရှိလို့ဖြစ်ပါတယ်။ ဆိုက်ပရပ်စ်နိုင်ငံသားတွေရဲ့ ပျမ်းမျှလူ့သက်တမ်းကတော့ ၈၃.၁ နှစ် ဖြစ်ပါတယ်။

နံပါတ် ၅။ စပိန်

စပိန်နိုင်ငံသားတွေအသက်ရှည်တဲ့ အကြောင်းတချက်ကတော့ နိုင်ငံသားအများစုဟာ မက်ဒစ်တရေးနီးယန်း ဒိုင်အက် Mediterranean Diet လို့ခေါ်တဲ့ အစားအစာ စားသုံးမှုပုံစံပေါ်မှာ အခြေခံကာ စနစ်တကျ စားသုံးကြလို့ ဖြစ်ပါတယ်။ အသီးအရွက် နဲ့ သစ်ဥသစ်ဖုများများ ၊ ငါး နဲ့ ပင်လယ်စာများများ ၊ အသား နဲ့ နို့ထွက်ပစ္စည်းတွေကိုလျော့ပြီး အခြား ကယ်လိုရီတက်ကာ ဝစေမယ့် အစားအစာတွေကို လျော့စားကြလေ့ရှိပါတယ်။ ဒါကြောင့်လည်း စပိန်မှာ အဝလွန်သူတွေ နဲ့ နှလုံးရောဂါ ဖြစ်သူတွေ နည်းတယ်လို့ သိရပါတယ်။ ဥရောပက ချမ်းသာတဲ့နိုင်ငံတနိုင်ငံ ဖြစ်တာနဲ့ အညီ စပိန်အစိုးရဟာလည်း ပြည်သူတွေကို ကောင်းမွန်တဲ့ ကျန်းမာရေး စောင့်ရှောက်မှု ပေးလျက်ရှိပါတယ်။ စပိန်နိုင်ငံသားတွေရဲ့ ပျမ်းမျှသက်တမ်းကတော့ ၈၃.၂ နှစ် ဖြစ်ပါတယ်။

နံပါတ် ၄။ စင်ကာပူ

စီးပွားရေး ၊ ပညာရေး ၊ လူနေမှုစနစ်တို့မှာ ကမ္ဘာ့ထိပ်ဆုံးနေရာတွေမှာ အမြဲရပ်တည်နေလေ့ရှိတဲ့ အရှေ့တောင်အာရှကျွန်းနိုင်ငံလေး စင်ကာပူဟာ ဒီစာရင်းမှာလည်း ထိပ်ပိုင်းနေရာမှာပဲ ရပ်တည်နေပြန်ပါတယ်။ စင်ကာပူနိုင်ငံဟာ လျှင်မြန်စွာဖွံဖြိုးလာတဲ့ စီးပွားရေးနည်းတူ နိုင်ငံရဲ့လူစွမ်းအားအရင်းအမြစ်ဖွံဖြိုးရေးကဏ္ဍကိုလည်း တစ်ပြေးညီ တိုးတက်မှုရှိအောင်လုပ်ဆောင်နိုင်တယ်လို့ဆိုရပါမယ်။

နိုင်ငံသားတိုင်းအတွက် အကောင်းဆုံးကျန်းမာရေးစောင့်ရှောက်မှုပေးနိုင်သလို တစ်ဖက်ကလည်း သဘာဝပတ် ဝန်းကျင်ထိန်းသိမ်းရေးလုပ်ငန်းတွေကို တိုးချဲ့ဆောင်ရွက်နေခဲ့ရာ အကျိုးရလဒ်ကတော့ စင်ကာပူဟာ ကမ္ဘာနေချင်စဖွယ်အကောင်းဆုံးမြို့တော်စာရင်းမှာ အမြဲလိုလိုကိုပါဝင် နေခဲ့တာဖြစ်ပါတယ်။ ဒါအပြင်အခြားသိမှတ်စရာတစ်ခုကတော့ စင်ကာပူဟာ ဂျပန်၊ ကိုရီးယား စတဲ့ထိပ်သီးနိုင်ငံတွေကို ကျော်ဖြတ်ပြီး အာရှရဲ့ အသန့်ရှင်းဆုံးနိုင်ငံအဖြစ် ရပ်တည်နေတာဖြစ်ပါတယ်။ စင်ကာပူနိုင်ငံသားတွေရဲ့ ပျမ်းမျှ လူ့သက်တမ်းကတော့ ၈၃.၂နှစ် ဖြစ်ပါတယ်။

နံပါတ် ၃။ တောင်ကိုရီးယား

တောင်ကိုရီးယားနိုင်ငံကတော့ အရှေ့အာရှမှာတည်ရှိပြီး နည်းပညာအလွန်တိုးတက်သလို သဘာဝတရားကိုလည်း ကောင်းမွန်စွာ ထိန်းသိမ်းထားနိုင်တဲ့ နိုင်ငံ ဖြစ်ပါတယ်။ အာရှရဲ့စီးပွားရေးအင်အားကြီး နိုင်ငံတနိုင်ငံဖြစ်သလို ကျန်းမာရေးစောင့်ရှောက်မှု စနစ်ကလည်း အထူးကောင်းမွန်ပါတယ်။ တောင်ကိုရီးယားရဲ့ အစားအစာအများစုဟာ ကယ်လိုရီနည်းပါးသလို နိုင်ငံသားတွေဟာလည်း ကိုယ်လက်လှုပ်ရှားလေ့ကျင့်ခန်းလုပ်ရတာကို ဝါသနာပါကြပါတယ်။ ပုံမှန်ရှိသင့်တဲ့ ခန္ဓာကိုယ်အရွယ်အစားထက် ပိုများနေသူဟာ တောင်ကိုရီးယားမှာ ၃% ပဲ ရှိတယ်လို့ သိရပါတယ်။ တောင်ကိုရီးယားနိုင်ငံသားတွေရဲ့ပျမ်းမျှသက်တမ်းကတော့ ၈၃.၃ နှစ် ဖြစ်ပါတယ်။

နံပါတ် ၂။ ဆွစ်ဇာလန်

ဥရောပမှာ ရှိတဲ့ ဆွစ်ဇာလန်နိုင်ငံဟာ သာယာအေးချမ်းပြီး ချမ်းသာတဲ့နိုင်ငံ တနိုင်ငံအဖြစ်ထင်ရှားပါတယ်။ သန့်ရှင်းတဲ့လေထု၊ရောဂါပိုးကင်းစင်တဲ့သောက်ရေ၊ မြင့်မားတဲ့လူနေမှုစနစ်တွေဟာ ဆွစ်လူမျိုးတွေ အသက်ရှည်ရခြင်းရဲ့လျို့ဝှက်ချက်ဖြစ်ပါတယ်။ နိုင်ငံရဲ့ စား သောက်ကုန်တွေကိုအမြဲတစ်စေကြီးကြပ်တဲ့ Mobile team အဖွဲ့များစွာရှိနေသလို အစိုးရရဲ့ကျန်းမာရေးစောင့်ရှောက်မှုလုပ်ငန်းတွေဟာလည်း အပျံစားဖြစ်တာကြောင့် အသက်ရှည်ဆုံး၊ အကြွယ်ဝဆုံးစတဲ့ ကောင်းမွန်တဲ့ ကမ္ဘာ့စံနှုန်းထား သတ်မှတ်ချက်တိုင်းမှာ ဆွစ်ဇာလန်ကို ချန်ခဲ့ဖို့ဆိုတာမဖြစ်နိုင်ပါဘူး။ ဆွစ်ဇာလန်နိုင်ငံရဲ့ ပျှမ်းမျှလူသက်တမ်းက တော့ (၈၃.၄)နှစ်ဖြစ်ပါတယ်။

နံပါတ် ၁။ ဂျပန်

ကျန်းမာရေး နဲ့ ပတ်သက်လို့ ဘယ်နိုင်ငံက အကျန်းမာဆုံးလဲ အသက်ရှည်ဆုံးလဲလို့ မေးလိုက်ရင် အများစုက ဂျပန်လို့ပဲ ဖြေကြမှာဖြစ်ပါတယ်။ ဒီလို လူသိများလောက်အောင်ကို ဂျပန်တွေရဲ့ ကျန်းမာမှု အသက်ရှည်မှုက ကျော်ကြားပါတယ်။ အာရှရဲ့စီးပွားရေးအတောင့်တင်းဆုံး နိုင်ငံဖြစ်သလို ကျန်းမာရေးစောင့်ရှောက်မှုအကောင်းဆုံး နိုင်ငံစာရင်းမှာလည်း ဂျပန်ဟာ ပါဝင်နေပါတယ်။ ကမ္ဘာပေါ်မှာ အသက် ၁၀၀ ကျော်တဲ့သူပေါင်း ၈၀၀၀၀ ဝန်းကျင်ရှိတဲ့ တခုတည်းသော နိုင်ငံလည်းဖြစ်ပါတယ်။

နူးညံ့သိမ်မွေ့နေတဲ့ရိုးရာဓလေ့ဟန်ပန်၊ သဘာဝရဲ့လတ်ဆတ်မှု ၊ အသီးအရွက် အသားငါးတွေကိုသာဦးစားပေးစားသုံးမှု ၊ နည်းစနစ်ကျနတဲ့ လူစွမ်းအားအရင်းအမြစ်ပျိုးထောင်မှု စတာတွေကို ပိုင်ဆိုင်ထားတဲ့ ဂျပန်နိုင်ငံဟာကမ္ဘာပေါ်မှာ ပျမ်းမျှလူ့သက်တမ်းအရှည်ဆုံး နိုင်ငံအဖြစ်ရပ်တည်ခဲ့တာ အတော်ကြာနေပါပြီ။ ဂျပန်လူမျိုးတွေရဲ့ ပျှမ်းမျှသက်တမ်းကတော့ ၈၄.၃ နှစ် ဖြစ်ပါတယ်။

သုတဇုန် မိတ်ဆွေတို့ရေ ဒီတခါမှာ မျှဝေခဲ့တာကတော့ ကမ္ဘာပေါ်က ပျမ်းမျှလူ့သက်တမ်းအရှည်ဆုံး နိုင်ငံ ၁၀ နိုင်ငံရဲ့ အကြောင်းပဲ ဖြစ်ပါတယ်။ နာက်ထပ်လည်း အခြား နိုင်ငံတကာ ဗဟုသုတတွေကို ဝေမျှသွားဦးမှာဖြစ်တဲ့အတွက် သုတဇုန် ယူကျူ့ချန်နယ်ကို Subscribe လုပ်သွားပေးကြပါဦးနော်။

အဆုံးထိနားဆင်ပေးကြတဲ့ သုတဇုန် မိတ်ဆွေ တယောက်ချင်းစီတိုင်း ရွှင်လန်းချမ်းမြေ့ကြပါစေရှင်…