အန္တရာယ်အရှိဆုံး လူဆိုးများကိုထားရှိရာ ကမ္ဘာ့အလုံခြုံဆုံး အကျဉ်းထောင်

Posted on

ဒီအကျဉ်းထောင်ကတော့ အမေရိကန် ကေ်ာလိုရာဒိုပြည်နယ် ဖလော့ရင့်မြို့မှာရှိတဲ့ ADX Florence အကျဉ်းထောင်ပဲ ဖြစ်ပါတယ်။ အရှည်ကောက်ကတော့ Administrative Maximum Facility ဖြစ်ပါတယ်။ ကမ္ဘာ့အန္တရာယ်အရှိဆုံး လူဆိုးများကို ထားရှိရာ အကျဉ်းထောင်ဖြစ်ပြီး လုံခြုံလွန်းတာကြောင့် Supermax လို့လည်း ခေါ်ကြပါတယ်။

၁၉၉၄ခုနှစ်က စတင်ဖွင့်လှစ်ခဲ့ပြီး ၃၇ဧက မြေပေါ်မှာ ဒေါ်လာသန်း ၆၀ အကုန်အကျခံကာ တည်ဆောက်ထားကာ အကျဉ်းသားပေါင်း ၅၀၀ ခန့်ကို ထားနိုင်ပါတယ်။ ပြစ်ဒါဏ်အကြီးဆုံးသူများကို ဒီထောင်မှာပဲ ထားလေ့ရှိပါတယ်။

ဒီအထဲမှာ ဖိနပ်ဗုံးထောင်သူ ၊ အလယ်လ်ကိုင်ဒါ လေယာဉ်ပြန်ပေးဆွဲသမား ၊ အိုလံပစ်ပန်းခြံ ဗုံးခွဲသူ နဲ့ ဝေါထရိတ်စင်တာကို တိုက်ခိုက်မှုတွင် အဓိကကြိုးကိုင်ခဲ့သူ စတဲ့ရာဇဝင် လူဆိုးများ ပါဝင်ပါတယ်။ အကျဉ်းသား ၄၀၈ယောက်သာ ရှိပေမယ့် လုံခြုံရေးဝန်ထမ်းကတော့ ၅၂၀ တောင်ရှိပါတယ်။

အကျဉ်းသားရဲ့ အခန်းဟာ ၇ပေ x ၁၂ပေ ကျယ်ပါတယ်။ အခန်းထဲမှာတော့ တီဗီတစ်လုံး(အချို့အခန်းတွေသာ) ၊ စားပွဲခုံတစ်လုံး ၊ ဖင်ထိုင်ခုံတစ်လုံး ၊ ကွန်ကရစ် ကုတင်တစ်လုံးသာ ထားရှိပါတယ်။ အိမ်သာကလည်း အလုံပိတ်ဖြစ်ပြီး ၊ ရေချိုးခန်းကိုလည်း အချိန်နဲ့သာ ဖွင့်ပေးပါတယ်။ ပြတင်းပေါက်ပါပေမယ့်  အကျယ် ၄လက်မပဲရှိတဲ့ ပြတင်းပေါက်ပါ။ တရားခံတွေဟာ အချိန်တိုင်းကို တစ်ကိုယ်တည်း ဖြတ်သန်းရပါတယ်။

မည်သူနဲ့မျှ တွေ့ဆုံခွင့်လည်း မရပါဘူး။ အခန်းထဲကနေ ၁နာရီထွက်ခွင့်ပြုပေမယ့် အပြင်ဘက်ရှု့ခင်းတွေကို ကြည့်ရခြင်းမဟုတ်ပဲ အခြားအခန်းတစ်ခုကို ပြောင်းထည့်ပေးခြင်းသာ ဖြစ်ပါတယ်။ ဒီလိုတစ်ကိုယ်တည်း အထီးကျန်စွာ ဖြတ်သန်းရတာကြောင့် ဒီအထဲကို ရောက်ပြီးတဲ့သူများဟာ အချိန်ကြာလာတာနဲ့အမျှ မှတ်ဉာဏ်ကျဆင်းတာ ၊ ဦးနှောက်မမှန်တော့တာတွေ ဖြစ်လာတယ် လို့ဆိုပါတယ်။

အပြင်ကလူတွေကိုလည်း ဝင်ရောက်ခွင့် တင်းကျပ်ထားပြီး ကင်မရာတောင် ရိုက်ခွင့်မရှိတဲ့ နေရာဖြစ်ပါတယ်။ လုံခြုံရေးအတွက် နေရာတိုင်းမှာ စစ်ဆေးရေးစက်တွေ ၊ ကင်မရာတွေကို တပ်ဆင်ထားတဲ့အပြင် လေဆာရောင်ခြည်နဲ့ ခွေးအစောင့်တွေလည်း ထားရှိပါတယ်။

ဒီထောင်ကို ဖွင့်လှစ်ခဲ့တဲ့ နှစ်ပေါင်း ၂၀ကျော်အတွင်းမှာ လွတ်မြောက်သူတစ်ဦးတစ်လေတောင် မရှိခဲ့ပဲ အကျဉ်းသား ၇ဦးကတော့ ကိုယ့်ကိုယ်ကို သတ်သေခဲ့ကြပါတယ်။

VIDEO