ဒီတစ်ခါတော့ သုတဇုန်မိတ်ဆွေများကို ဗဟုသုတအနေနဲ့ ကမ္ဘာ့အကြီးဆုံး မိကျောင်းကြီးတွေအကြောင်းကိုဖော်ပြသွားပါမယ်။
၅။ Brutus
သူဟာ အလွန်ကြီးမားတဲ့ ရေငန်မိကျောင်းအမျိုးအစားဖြစ်ပြီး သြစတြေးလျနိုင်ငံမြောက်ပိုင်းက Adelaide မြစ်ထဲမှာရှိတာပါ။ ဒီမိကျောင်းကြီးမှာ ခြေလက် ၃ချောင်းပဲ ပါပါတယ်။ ဒီလိုဖြစ်ရခြင်းကတော့ ငါးမန်းတွေနဲ့ တိုက်ပွဲမှာ ငါးမန်းအကိုက်ခံရတာကြောင့်လို့ ဆိုကြပါတယ်။ ဒီမိကျောင်းကြီးရဲ့ အသက်ဟာ ၈၀ကျော်ပါပြီ။
ပြီးခဲ့တဲ့ ၃-၄နှစ်ကတည်းက ငါးမန်းတစ်ကောင်ကို ကိုက်ချီနေတဲ့ပုံရိပ်တွေကြောင့် အင်တာနက်ပေါ်မှာ လူသိများခဲ့တဲ့မိကျောင်းကြီးလည်းဖြစ်ပါတယ်။ ဒီမိကျောင်းကြီးရဲ့ အရှည်ကတော့ ၁၈ပေ ၄လက်မ ရှိပါတယ်။ မိကျောင်းကြီးကိုတွေ့ချင်တဲ့ ခရီးသွားတွေဟာ Adelaide မြစ်ထဲကို သွားပြီး အစာကျွေးလေ့ရှိကြပါတယ်။
၄။ Bujang Senang
သူကတော့ မလေးရှားနိုင်ငံ ဘိုနီယိုကျွန်းစုအနီးမှာ ရှိခဲ့တဲ့ရေငန်မိကျောင်းကြီးတစ်ကောင်ဖြစ်ပါတယ်။ အခုတော့ မရှိတော့ပါဘူး။ လွန်ခဲ့တဲ့ နှစ် သုံးလေးဆယ်လောက်ကတည်းက လူတွေကို စားသောက်ခြင်း အန္တရာယ်ပြုခြင်းတွေကို လုပ်ခဲ့တဲ့ အတွက် လူသားစားမိကျောင်းကြီး အဖြစ်နာမည်ကြီးခဲ့ပါတယ်။
နောက်ပိုင်းမှာတော့ မိကျောင်းဖမ်းသမားတွေဟာ ဒီမိကျောင်းကြီးကို မိသွားပြီး သတ်ဖြတ်ပြစ်ခဲ့ပါတယ်။ မိကျောင်းကြီးကို သတ်ခဲ့တဲ့နေ့ကတော့ ၁၉၉၂ခုနှစ် မေလ ၂၀ရက်နေ့ဖြစ်ပါတယ်။ အရွယ်အစားကို တိုင်းတာကြည့်တဲ့အခါမှာတော့ အရှည် ၁၉ပေ ၃လက်မရှိပြီး အလေးချိန် ၁တန်ကျော်လေးပါတယ်။ ဒီမိကျောင်းကြီးရဲ့ ဦးခေါင်းခွံကို မလေးရှားနိုင်ငံ Sarawak ပြတိုက်မှာ ပြသထားပါတယ်။
၃။ Gustave
ဒီမိကျောင်းကြီးက ကမ္ဘာမှာအကြီးမားဆုံး မဟုတ်ပေမယ့် ကြောက်စရာအကောင်းဆုံး မိကျောင်းကြီးဖြစ်ခဲ့ပါတယ်။ အာဖရိက ဘရွန်ဒီနိုင်ငံမှာသောင်းကြမ်းခဲ့တဲ့ နိုင်းမြစ်မိကျောင်းကြီးတစ်ကောင်ဖြစ်ပါတယ်။ ဘယ်လောက်ရက်စက်ကြမ်းကြုတ်ခဲ့သလဲ ဆိုရင် ဒီမိကျောင်းကြီးဟာ Ruzizi မြစ် နဲ့ Tangaayika ကမ်းခြေတွေမှာ လှည့်လည်ကျက်စားရင်း လူပေါင်း ၃၀၀ ထက်မနည်းကို သတ်ဖြတ်ပစ်ခဲ့လို့ ဖြစ်ပါတယ်။
Gustave ဟာ လူတွေကိုသာမက ကျွဲရိုင်း ၊ တောင်ဆိတ် နဲ့ မြင်းကျားတွေကိုပါတိုက်ခိုက် သတ်ဖြတ်လေ့ရှိပါတယ်။ သူ့ရဲ့ပါးစပ်ထဲမှာ သွားအနည်းငယ်သာ ကျန်တော့တာကိုကြည့်ပြီး ပညာရှင်တွေကတော့ ဒီမိကျောင်းကြီးရဲ့ အသက်ကို နှစ် ၁၀၀ ဝန်းကျင်လို့ ခန့်မှန်းကြပါတယ်။
လူသားတွေကရဲ့ အမဲလိုက် တိုက်ခိုက်မှုကြောင့် တစ်ကိုယ်လုံးမှာလည်း ထိုးရာ ခုတ်ရာ ကျည်ဆန်ရာ ဒါဏ်ရာ ဒါဏ်ချက်တွေပြည့်နှက်နေခဲ့ပေမယ့် ဒီမိကျောင်းကြီးကို ဖမ်းဆီးသတ်ဖြတ်နိုင်ခြင်း မရှိခဲ့ပါ။ အရှည် ၁၉ပေ ၆လက်မ ရှိတဲ့ ဒီမိကျောင်းကြီးကို မတွေ့ရတော့ကြာပြီဖြစ်ပေမယ့် သေသွားပြီလား ရှင်နေဆဲလားဆိုတာကိုတော့ အတိအကျမသိကြပါဘူး။
၂။ Dominator
ဒီမိကျောင်းကြီးကတော့ အပေါ်မှာဖော်ပြခဲ့တဲ့ Brutus မိကျောင်းကြီးနဲ့ နေထိုင်ကျက်စားရာဒေသတူပြီး သူလည်း သြစတြေးလျှနိုင်ငံ Adelaide မြစ်ထဲမှာ ရှိပါတယ်။ Brutus ထက် နည်းနည်းပိုကြီးပြီး အရှည် ၂၀ပေ နဲ့ အလေးချိန် ၁တန်ကျော် ရှိပါတယ်။
မိကျောင်းကြီးရှိတဲ့နေရာကို မိကျောင်းကျွမ်းကျင်သူတွေက ရှာဖွေပေးပြီး အဲဒီနေရာမှာ ခရီးသွားတွေဟာ မိကျောင်းကြီးကို အစာကျွေးလေ့ရှိပါတယ်။ ချက်ချင်းကျွေးလို့မရပဲ အချိန် ၁၀မိနစ်ခန့် စောင့်ရတယ်လို့ သိရပါတယ်။ အစာကိုလေထဲမှာ မြှောက်ထားချိန်မှာ မိကျောင်းကြီးဟာ ရေထဲကနေ လှေတစ်မြင့်နီးပါးခုန်တက်ပြီး အစာကို စားသောက်လေ့ရှိပါတယ်။
၁။ Lolong
လောင်းလောင်းဆိုတဲ့ ဒီမိကျောင်းကြီးကိုတော့ အင်တာနက်ပေါ်မှာ မကြာခဏမြင်ရလေ့ရှိတာကြောင့် သိတဲ့သူများမယ် ထင်ပါတယ်။ မှတ်တမ်းတင်နိုင်ခဲ့သမျှ မိကျောင်းတွေထဲမှာ အကြီးဆုံးဖြစ်ပြီး ၂၀ပေ နဲ့ ၃လက်မ ရှိကာ အလေးချိန် ၁.၂တန် ရှိပါတယ်။ ရေငန်မိကျောင်းတစ်ကောင်ဖြစ်ပြီး ဖိလစ်ပိုင်နိုင်ငံ မှာကျက်စားခဲ့ပါတယ်။
ဒီမိကျောင်းကြီးကို ဖိလစ်ပိုင်နိုင်ငံ Agusan del Sur ဒေသက Bunawan ချောင်းထဲမှာ ၂၀၁၁ခုနှစ် စက်တင်ဘာလမှာ ဖမ်းမိခဲ့တာပဲဖြစ်ပါတယ်။ အဲဒီအချိန်က သူ့ရဲ့အသက်ဟာ ၅၀နှစ်ခန့် ရှိပါပြီ။ တံငါသည်တစ်ယောက်နဲ့ ၁၂နှစ်အရွယ်မိန်းကလေးတစ်ယောက်တို့ကို သတ်ဖြတ်စားသောက်ခဲ့တယ်လို့ စစ်ဆေးတွေ့ရှိခဲ့ပြီးနောက်ပိုင်းမှာ Palawan မိကျောင်းနဲ့ တောရိုင်းထိန်းသိမ်းရေးဌာနက မိကျောင်းဖမ်းသမားတွေက လိုက်လံဖမ်းဆီးခဲ့ကြတာပဲဖြစ်ပါတယ်။
ဖမ်းဆီးပြီးတဲ့နောက်မှာ ဖိလစ်ပိုင်နိုင်ငံမြို့တော် မနီလာက အမျိုးသားသမိုင်းပြတိုက်မှာ ထိမ်းသိမ်းပြသထားခဲ့ပါတယ်။ မိကျောင်းကြီးဟာ ဖမ်းဆီးခံခဲ့ရပြီး ၁နှစ်ခွဲအကြာ ဖေဖော်ဝါရီ ၂၀၁၃ခုနှစ်မှာ သေဆုံးခဲ့ပါတယ်။
